ٹرین سروس میرا ایک خواب تھا جو میری زندگی میں ہی پورا ہوا:فاروق

سرینگر//
نیشنل کانفرنس کے صدر اور سابق وزیر اعلیٰ ڈاکٹر فاروق عبداللہ نے وندے بھارت ٹرین سروس کو ایک کرم سے تعبیر کرتے ہوئے کہا کہ یہ میرا ایک خواب تھا جو میں نے اپنی زندگی میں پورا ہوتے دیکھا۔انہوں نے کہا کہ اس ٹرین سے سیاحت کو فروغ ملے گا اور ہمارا کاروبار بھی بڑھے گا۔
این سی صدر نے ان باتوں کا اظہار بدھ کو وندے بھارت ٹرین کے ذریعے کٹرا سے واپس سرینگر آنے پر نامہ نگاروں کے ساتھ بات کرتے ہوئے کیا۔
ڈاکٹر فاروق منگل کے روز وندے بھارت ایکسپریس، جو کشمیر کو ملک کے باقی حصوں سے جوڑتی ہے ، کے ذریعے کٹرا پہنچے تھے یہ ان کا اس ریل میں کیا جانے والا پہلا سفر تھا۔
اس دوران ان کے پوتے ضمیر اور زاہد، جموں و کشمیر کے وزیر ستیش شرما، وزیر اعلیٰ عمر عبداللہ کے مشیر ناصر اسلم وانی اور پارٹی کے ترجمان اعلیٰ ترجمان تنویر صادق بھی ان کے ہمراہ تھے ۔
ڈاکٹرفاروق نے یہاں میڈیا کو بتایا’’بہت اچھا سفر رہا، اب سیاح آرہے ہیں، اس ریل کی بڑی مہربانیاں ہیں، اس سے سیاحت کو فروغ ملے گا، ہمارا کاروبار بار بڑھے گا اور ہمارے لوگ ملک کے کسی بھی حصے میں جا سکتے ہیں‘‘۔
حکمران جماعت کے صدرنے کہا’’یہ میرا ایک خواب تھا جس کو میں نے اپنی زندگی میں ہی پورا ہوتے ہوئے دیکھا‘‘۔
ایک سوال کا جواب دیتے ہوئے ان کا کہنا تھا’’ماتا ویشنو دیوی کے درشن کے دوران میں نے امن، محبت بھائی چارے اور ترقی کے لئے دعا کی۔‘‘