کشمیر کو ریل سے جوڑنے کا خواب نریندر مودی کی قیادت میں شرمندہ تعبیر ہوا :ڈاکٹر جتیندر سنگھ

جموں//
وزیر اعظم کے دفتر میں وزیر مملکت ڈاکٹر جتیندر سنگھ نے جمعے کے روز کہا کہ جموں و کشمیر کو ریل کے ذریعے ملک کے دیگر حصوں سے جوڑنے کا خواب وزیر اعظم نریندر مودی کی قیادت میں پورا ہوا ہے ۔
ڈاکٹر جتیندر نے کہا کہ جموں کو ریل سے ۱۹۷۲میں جوڑا گیا تھا، مگر شاید تقدیر اس لمحے کا انتظار کر رہی تھی جب نریندر مودی وزیر اعظم بنیں اور کشمیر بھی ریل کے قومی نیٹ ورک سے جُڑ جائے ۔
مرکزی وزیر نے جمعہ کے روز کٹرا میں وزیر اعظم نریندر مودی کے ہاتھوں کٹرا تا سرینگر وندے بھارت ایکسپریس کے افتتاحی پروگرام کے دوران خطاب کرتے ہوئے کہا’’جموں۱۹۷۲میں ریل سے جُڑا، اور یہ تاریخی موقع تھا۔ لیکن کشمیر کے لیے یہ لمحہ اب آیا ہے ، اور شاید یہ مقدر کا فیصلہ تھا کہ جب نریندر مودی جی وزیر اعظم بنیں گے ، تب ہی کشمیر کو بھی ریل نیٹ ورک سے جوڑنے کا خواب پورا ہو گا‘‘۔
ڈاکٹر جتیندر نے کہا کہ یہ صرف ایک ریل لائن نہیں بلکہ قومی اتحاد، یکجہتی، اور نئی ترقی کی علامت ہے ۔ ڈاکٹر سنگھ نے زور دے کر کہا کہ ریل کنکشن اب محض جغرافیائی فاصلے کم کرنے کا ذریعہ نہیں رہا بلکہ دلوں کو جوڑنے اور معیشت کو نئی رفتار دینے کا ایک طاقتور ذریعہ بن چکا ہے ۔
مرکزی وزیر نے اس منصوبے میں شامل انجینئرز، مزدوروں اور مقامی عوام کی حوصلہ افزائی کرتے ہوئے کہا کہ اتنے دشوار گزار پہاڑی علاقوں، گہری وادیوں اور ناقابلِ رسائی مقامات پر کام کرنا ایک چیلنج ضرور تھا، لیکن ان سب کی محنت نے ناممکن کو ممکن بنا دیا۔
ڈاکٹر جتیندر نے کہا کہ یہ صرف کشمیر کے لیے ہی نہیں بلکہ پورے بھارت کے لیے ایک فخر کا لمحہ ہے ، اور مودی حکومت نے جس عزم اور وژن کے ساتھ اسے ممکن بنایا، وہ آنے والی نسلوں کے لیے ایک مثال بنے گا۔