رام بن میں یو اے پی اے کےتحت غیر منقولہ جائیداد ضبط:پولیس

سرینگر//
جموں کشمیر پولیس نے ضلع رام بن کے دھرم کنڈ علاقے میں غیر قانونی سرگرمیاں (روک تھام) ایکٹ (یو اے پی اے ) کی دفعہ۲۵کے تحت زرعی اراضی کی صورت میں غیر منقولہ جائیداد ضبط کی ہے ۔
ایک پولیس ترجمان نے اپنے ایک بیان میں بتایا’’دہشت گردی سے نمٹنے کے لیے ایک اہم اقدام میں، رام بن پولیس نے غیر قانونی سرگرمیوں کی (روک تھام) ایکٹ (یو اے پی اے )۱۹۶۷کے سیکشن۲۵کے تحت ایک کنال۱۱مرلہ زرعی اراضی کو ضبط کر لیا ہے‘‘۔
ترجمان نے کہا’’مذکورہ اراضی پاکستان زیر قبضہ کشمیر میں مقیم ملی ٹنٹ علی محمد عرف ابراہیم شیخ ولد عبداللہ شیخ ساکن سمبر کے نام خسرہ نمبر۶۷۵؍اور کھیوٹ نمبر۹۸کے تحت درج ہے‘‘۔
ان کا کہنا ہے کہ یہ جائیداد ریونیو ریکارڈ میں درج کی گئی ہے اور غیر قانونی سرگرمیاں (روک تھام) ایکٹ (یو اے پی اے ) کے تحت اس کی فروخت یا منتقلی پر پابندی کے نوٹس جاری کیے گئے ہیں۔
بیان میں کہا گیا’’یہ ضبطی یو اے پی اے کے متعلقہ دفعات کے تحت پولیس اسٹیشن دھرم کنڈ میں درج ایف آئی آر نمبر۲۰۲۴/۲میں انجام دی گئی اور اس کو قانونی طریقہ کار کی مکمل تعمیل کو یقینی بناتے ہوئے پولیس ٹیم اور ایک ایگزیکٹیو مجسٹریٹ کی موجودگی میں انجام دیا گیا‘‘۔
پولیس بیان میں مزید کہا گیا کہ یہ کارروائی خطے میں غیر قانونی اور تخریبی سرگرمیوں میں جاری تحقیقات میں ایک اہم سنگ میل کی نشاندہی کرتی ہے ۔انہوں نے کہا کہ یہ قومی سلامتی کو لاحق خطرات کو بے اثر کرنے اور امن و امان کو برقرار رکھنے کے لیے رام بن پولیس کی لگن کو اجاگر کرتی ہے ۔