ریل رابطے کا افتتاح:۶ جون کوجموں کشمیر میں نئے دور کا آغاز ہوگا:سنہا

سرینگر//
لیفٹیننٹ گورنر‘ منوج سنہا نے آج کہا کہ ادھم پور،سرینگر،بارہمولہ ریلوے لنک جو کشمیر کو کنیاکماری سے جوڑے گا، جموں و کشمیر یونین ٹیریٹری کے لیے نئے دور کا آغاز کرے گا۔
لیفٹیننٹ گورنر نے کہا کہ دنیا کی بلند ترین چناب ریلوے پل‘۳۶ سرنگوں اور۹۴۳ دیگر پلوں کا جال سال بھر رابطے کی ضمانت دیتا ہے، جو عروج پذیر کشمیر کے خوابوں اور وزیر اعظم نریندر مودی کے عزم کی عکاسی کرتا ہے۔
سنہا نے کہا’’وزیر اعظم نریندر مودی نے جموں و کشمیر کے لیے جامع اور پرجوش مستقبل تخلیق کیا ہے۔ وزیر اعظم کی قیادت میں جموں و کشمیر نے ہر شعبے میں نئی توانائی دیکھی ہے اور جامع ترقی نے یقینی بنایا ہے کہ معاشرے کا کوئی طبقہ پیچھے نہ رہ جائے۔ وزیر اعظم کے ویڑن اور ترقیاتی منصوبوں کی تیز رفتار تکمیل نے جموں و کشمیر کی ترقی پر گہرا اثر ڈالا ہے، اور جو پہلے ناممکن لگتا تھا وہ ممکن ہو گیا ہے‘‘۔
لیفٹیننٹ گورنر نے وضاحت کرتے ہوئے کہا کہ وزیر اعظم مودی نے ۲۰۲۲ کے بعد سے جموں و کشمیر کا۵ بار دورہ کیا اور۶۴ہزار۴۰۰ کروڑ روپے کے بڑے انفراسٹرکچر منصوبوں کا سنگ بنیاد رکھا یا افتتاح کیا۔ اس کے علاوہ پی ایم ڈی پی کے تحت۵۸ہزار۴۷۷کروڑ روپے کے۵۳ منصوبے اور ہزاروں کروڑ روپے کے دیگر رابطے اور ترقیاتی منصوبے جموں و کشمیر کو تیز رفتار ترقی کی راہ پر گامزن کر رہے ہیں۔
سنہا نے کہا’’۴۳ہزار۷۸۰ کروڑ روپے کی یہ ریلوے منصوبہ جو کشمیر کو کنیاکماری سے جوڑے گا، انجینئرنگ کی معراج ہے۔ یہ تجارت، کاروبار اور ہر موسم میں نقل و حمل کے لیے مثالی ماحول پیدا کرے گا، اور میرا پختہ یقین ہے کہ یہ مستقبل کی ریلوے لائن ہے‘‘۔
لیفٹیننٹ گورنر نے زور دے کر کہا کہ وزیر اعظم نریندر مودی کی قیادت میں جموں کشمیر ایک ترقی یافتہ اور خود کفیل یونین ٹیریٹری بننے جا رہا ہے۔ انہوں نے کہا کہ وزیر اعظم کے ’نئے جموں و کشمیر کے لیے نیا ویڑن‘ نے سماجی و اقتصادی تبدیلیوں اور ایک خوشحال معاشرے کو یقینی بنایا ہے جو تمام شہریوں کو برابر سمجھتا ہے۔
ایل جی نے مزید کہا’’وزیر اعظم کا انفراسٹرکچر پر زور یونین ٹیریٹری کی تبدیلی، ملک کے دیگر حصوں سے رابطے میں بہتری، صنعتی سرگرمیوں میں اضافہ، زندگی کے معیار کو بلند کرنے اور وسیع تر اقتصادی شرکت کو فروغ دینے کے لیے ہے۔ رابطہ خوشحالی لاتا ہے، اور یہ تاریخی ریلوے لائن جموں و کشمیر کی صلاحیتوں کو اجاگر کرے گی اور دور دراز علاقوں میں معاشی ترقی کو نئی بلندیوں پر لے جائے گی۔‘‘