ماحولیات کا عالمی دن‘کشمیر اور پلاسٹک کا استعمال

آج ماحولیات کا عالمی دن منایا جارہا ہے اور امسال اس مو قع پر دنیا بھر میں پلاسٹک(پالی تھین) کے بڑھتے ہو ئے استعمال اور اس سے پیدا شدہ خطرات پر توجہ مرکوز کی جائیگی ۔
پلاسٹک کی آلودگی دنیا کے ہر کونے میں سرایت کر گئی ہے۔حتیٰ کہ پینے کے پانی، کھانے کی اشیاء اور ہمارے جسموں میں شامل ہو رہی ہے۔ اگرچہ پلاسٹک کی آلودگی ایک بڑا مسئلہ ہے، لیکن یہ آج کے ماحولیات کے چیلنجز میں سے ایک ایسا مسئلہ بھی ہے جسے درست کیا جا سکتا ہے، جس کے لیے کچھ واضح حل موجود ہیں۔
اقوام متحدہ کی ماحولیاتی اسمبلی میں ۲۰۲۲ میں پلاسٹک آلودگی کے حوالے سے ایک قرارداد منظور کی گئی اور اسی پس منظر میں اس سال کا عالمی ماحولیاتی دن اس وقت منایا جا رہا ہے جب ممالک پلاسٹک آلودگی کے خاتمے کے لیے عالمی معاہدے کو محفوظ کرنے کی جانب پیشرفت کر رہے ہیں۔
اس سال عالمی ماحولیات کے دن کا مقصد دنیا بھر کو متحرک کرنا ہے اور بڑھتے ہوئے سائنسی شواہد پر روشنی ڈالنا کہ پلاسٹک آلودگی کے اثرات کیا ہیں اور پلاسٹک کے استعمال کو انکار کرنے، کم کرنے، دوبارہ استعمال کرنے، ری سائیکل کرنے، اور دوبارہ سوچنے کی رفتار کو فروغ دینا ہے۔ یہ۲۰۲۲ میں پلاسٹک آلودگی کے خاتمے کے لیے ایک عالمی پلاسٹک آلودگی معاہدے کے تحت کیے گئے عالمی عزم کو بھی تقویت دے گا۔
ماہرین کا ماننا ہے کہ دنیا ایک پلاسٹک بحران کا شکار ہے، موجودہ صورت حال ایک آپشن نہیں ہے یعنی ہم جوں کی توں پوزیشن برقرار رکھنے کے متحمل نہیںہو سکتے ہیں۔ پلاسٹک آلودگی ایک سنگین عالمی مسئلہ ہے جس کیلئے ایک ہنگامی اور بین الاقوامی جواب کی ضرورت ہے جس میں مختلف سطحوں پر تمام متعلقہ کردار شامل ہوں۔
جہاں تک جموں کشمیر کی بات ہے تو پلاسٹک کی تھیلیوں اور ایک بار استعمال ہونے والے پلاسٹک پر عائد مکمل پابندی کے باوجود، ان نان بایوڈیگریڈایبل اشیاء کا کھلے عام استعمال کیا جا رہا ہے، جس کے نتیجے میں جموں و کشمیر کے صاف ستھرے ماحول میں آلودگی پیدا ہو رہی ہے۔
تخمینوں کے مطابق جموں و کشمیر میں ہر سال۵۰ہزار ٹن سے زیادہ پلاسٹک اور پالی تھین کا کچرا پیدا ہوتا ہے۔ تاہم، مواد کو جمع کرنے اور الگ کرنے کے لیے سائنسی عمل کی عدم موجودگی میں، نان بایوڈیگریڈایبل اشیاء ، خاص طور پر پالی تھین، پانی کے ذخائر، لینڈ فلز اور جنگلاتی علاقوں میں پھینکی جا رہی ہیں‘ ماحول کو نقصان پہنچا رہی ہیں اور آلودہ کر رہی ہیں۔
جموںکشمیر میں یکم جولائی جولائی ۲۰۲۲ سے سنگل یوز پلاسٹک کی تیاری، درآمد، ذخیرہ اندوزی، تقسیم، فروخت اور استعمال پر مکمل پابندی عائد کر دی گئی۔ ممنوعہ اشیاء میں پالی تھین کے تھیلے، غباروں والی پلاسٹک کی چھڑیاں، پلاسٹک کے جھنڈے، کینڈی اسٹکس، آئس کریم اسٹکس، پولیسٹیرین، سجاوٹ کے لیے تھرموکول، پلیٹس، کپ، گلاس، کانٹے، چمچے، چھریاں، اسٹرا، ٹرے، مٹھائی کے ڈبوں پر لپیٹنے یا پیکنگ فلمیں شامل ہیں۔
اس پابندی کے اعلان کو تقریباً تین سال گزرنے کے باوجود، جموں و کشمیر میں پلاسٹک اور اس سے متعلقہ مصنوعات کا بے دریغ استعمال جاری ہے کیونکہ اس پر کوئی موثر کنٹرول نہیں ہے۔
پلاسٹک کے ماحول پر مضر اثرات پر کئی بار احتجاج ہو چکا ہے جبکہ۲۰۰۶ میں، جموں و کشمیر ہائی کورٹ نے سیاحتی مقامات اور صحت کے اداروں میںپلاسٹک کے تھیلوں کے داخلے، استعمال اور فروخت پر مکمل پابندی عائد کر دی تھی، لیکن حکام اس حکم پر عمل درآمد کرنے میں ناکام رہے۔
تحقیق کے مطابق، محققین نے پایا ہے کہ دنیا کی تقریباً ۵۰ فیصد آبادی ان علاقوں میں رہ رہی ہے جہاں پیدا ہونے والا پلاسٹک کچرا پہلے ہی اس کے انتظام کی گنجائش سے تجاوز کر چکا ہے۔ یہ تخمینہ لگایا گیا ہے کہ ستمبر ۲۰۲۵ تک، پلاسٹک آلودگی کے بحران کی وجہ سے ترقی پذیر ممالک پر مسلسل دباؤ کی وجہ سے یہ شرح ۷۰ فیصد تک بڑھ جائے گی۔
کشمیر ایک سیاحتی مقام ہے اور سیاحت کا براہ راست تعلق ہماری معیشت اور آمدنی کے ساتھ ہے ۔ سیاحت کا ہمارے جی ڈی پی میں ۷ تا ۸ فیصد حصہ ڈالتی ہے ۔اس ناطے پابندی کے باوجود پلاسٹک کا بے دریغ استعمال کشمیر کے ماحولیات کو جو نقصان پہنچا رہاہے اس کا مستقبل میں یہاں کے سیاحتی مقامات ‘ یہاں کی خوبصورتی اور آب و ہوا پر منفی اثرات مرتب کرسکتا ہے ۔
یقینا حکومت پلاسٹک کے استعمال پر پابندی کو موثر انداز میں نافذ کرنے میں ناکام رہی ہے ‘لیکن تصویر کا دوسرا پہلو یہ ہے کہ ایک عام کشمیری پلاسٹک کے استعمال کو روکنے میں کتنا حساس اور سنجیدہ ہے ۔ بہ حیثیت ایک قوم کشمیریوں نے پلاسٹک کے بڑھتے استعمال اور اس کے ممکنہ اثرات پر کبھی اپنی تشویش اور فکر مندی کا واضح اظہار نہیں کیا ۔ اگر کیا ہو تا تو پلاسٹک کا استعمال بڑھتا نہیں بلکہ اس میں بتدریج کمی آتی ہے ۔ان لوگوں کا بھی حوصلہ ٹوٹ جاتا جو پلاسٹک کے کار و بار سے منسلک ہیں اور محض اپنے مالی مفادات کی خاطر اس زہر کو در آمد کرتے ہیں ۔
پلاسٹک کا استعمال کرکے ہم ان لوگوں کی تجوریوں کو بھر تو رہے ہیں جو اس کار و بار سے وابستہ ہیں لیکن ساتھ ساتھ ہم کشمیر کوان بیش قیمتی خزانوں … صاف آب و ہوا ‘ سفید و شرین پانی ‘ سرسبز کھیت و کھلیان‘وسیع و عریض و گھنے جنگلات سے محروم کرنے کے راستے پر چل پڑے ہیں کیونکہ پلاسکٹ ذرخیز زمین کو بنجر میں تبدیل کر دیتا ہے ۔
آج عالمی ماحولیات کے دن پر پلاسٹک سے انکار سے ہم جموں کشمیر اور دنیا کا مستقبل محفوظ بنا سکتے ہیں ‘یقینا اس کیلئے اجتماعی کوششوں کی ضرورت ہے … لیکن بہ حیثیت ایک حساس اور ذمہ دار شہری کے ہم پلاسٹک کا استعمال نہ کرکے انفرادی طور پر اس ضمن میں اپنا پہلا قدم اٹھا سکتے ہیں ۔