انگلینڈ نے ون ڈے سیریز میں ویسٹ انڈیز کا صفایا کر دیا

دی اوول (انگلینڈ)//گیند بازوں کی شاندار کارکردگی کے بعد جیمی اسمتھ (64)، بین ڈکٹ (58)، جو روٹ (44) اور جوس بٹلر (ناٹ آؤٹ 41) کی شاندار اننگز کی بدولت انگلینڈ نے بارش سے متاثرہ تیسرے ون ڈے میچ میں ویسٹ انڈیز کو ڈک ورتھ لوئس (ڈی ایل ایس) ضابطے کے تحت 62 گیندیں باقی رہتے ہوئے سات وکٹوں سے ہرا کر تین میچوں کی سیریز 3-0 سے اپنے نام کر لی۔
کیننگٹن اوول اسٹیڈیم میں منگل کی دیر رات کھیلے گئے میچ میں انگلینڈ نے ٹاس جیت کر پہلے گیند بازی کا فیصلہ کیا۔ بیٹنگ کے لیے اتری ویسٹ انڈیز نے شرفین ردرفورڈ (70)، گڈاکیش موتی (63) کی نصف سنچری اننگز اور الزاری جوزف (41)، کیسی کارٹی (29)، برینڈن کنگ (16) اور جسٹن گریوز (12) رنز کے تعاون سے 40 اوورز میں نو وکٹوں پر 251 رنز بنائے۔ میچ دو بار متاثر ہوا۔ ٹریفک جام کے مسئلے کی وجہ سے ویسٹ انڈیز کی ٹیم ٹاس کے لیے مقررہ وقت پر میدان تک نہ پہنچ سکی۔ اس کے بعد بارش کی وجہ سے 90 منٹ کا کھیل متاثر ہوا۔ انگلینڈ کی جانب سے عادل رشید نے تین وکٹیں لیں۔ ثاقب محمود، برائیڈن کارس اور میتھیو پوٹس کو دو دو وکٹیں ملیں۔
انگلینڈ کے لیے جیمی اسمتھ اور بین ڈکٹ کی اوپننگ جوڑی نے طوفانی انداز میں بیٹنگ کرتے ہوئے پہلی وکٹ کے لیے 93 رنز جوڑے۔ ساتویں اوور میں گڈاکیش موتی نے جیمی اسمتھ (28 گیندوں پر 64 رنز) کو بولڈ کر کے ویسٹ انڈیز کو پہلی کامیابی دلائی۔ انگلینڈ کی دوسری وکٹ بین ڈکٹ (46 گیندوں پر 58 رنز) کے طور پر گری ۔ انہیں 16ویں اوور میں روسٹن چیس نے لوئس کے ہاتھوں کیچ آؤٹ کرایا۔ جو روٹ (44) کو الزاری جوزف نے شکار کیا۔ انگلینڈ نے 29.4 اوورز میں تین وکٹوں پر 246 رنز بنا کر ڈی ایل ایس طریقے سے میچ 62 گیندیں باقی رہتے سات وکٹوں سے جیت لیا۔ کپتان ہیری بروک (26) اور جوس بٹلر (41) رنز بنا کر ناٹ آؤٹ رہے۔ انگلینڈ کو ڈک ورتھ لوئس طریقے سے 40 اوورز میں جیت کے لیے 246 رنز کا ہدف ملا تھا جسے اس نے 62 گیندیں باقی رہتے حاصل کر لیا۔ ویسٹ انڈیز کی جانب سے الزاری جوزف، گڈاکیش موتی اور روسٹن چیس نے ایک ایک بلے بازکو آؤٹ کیا۔