اجی کوئی اور کہتا تو ہم اسے دیوانے کی بڑ کہہ کر مسترد کرتے … پائے حقارت سے ٹھکراتے … لیکن جب اپنے وزیر دفاع ‘راج ناتھ سنگھ جی کہہ رہے ہیں… یہ کہہ رہے ہیں کہ وہ دن دور نہیں جب مقبوضہ کشمیر کے لوگ رضاکارانہ طور پر پاکستان کو ٹاٹا بائی بائی کہہ کر…پاکستان سے اپنا رشتہ توڑ کر بھارت سے رشتہ جوڑ دیں گے تو… تو یقین کیجئے کہ ہمیں ان کی اس بات پر یقین ہے… سو فیصد ہے اور… اور اس لئے ہے کیوں کہ راج ناتھ جی جو کہتے ہیں وہ ہوتا ہے… وہ کرتے ہیں ۔آپریشن سندور سے کچھ دن پہلے انہوں نے قوم کو یقین دلایا کہ وزیر اعظم مودی یقینا کارروائی کریں گے… پہلگام حملے کا بدلہ لیں گے تو… تو ایسا ہی ہوا … مودی جی نے آپریشن سندور شروع کرکے قوم کو دکھایا کہ … کہ مودی ہے تو … تو ممکن ہے ۔ اسی بات کو ذہن میں رکھتے ہو ئے اپنے وزیر دفاع کہتے رہتے ہیں کہ مقبوضہ کشمیر ایک نہ ایک دن بھارت کا حصہ بن جائیگا … اور جس یقین کے ساتھ یہ جناب ایسا کہتے ہیں… اس یقین کی وجہ ان کا ’مودی ہے تو ممکن ہے‘ پر یقین ہو نا ہے… اورہمیں راج ناتھ جی پر یقین ہے …یہ یقین کہ یہ جناب جو کچھ بھی کہہ رہے ہیں ‘پاکستان کے زیر قبضہ کشمیر کے بارے میں کہہ رہے ہیں وہ سچ ثابت ہو جائیگا اور…اور اس سچ کو سچ ثابت ہونے میں اب زیادہ انتظار نہیں کرنا پڑے گا کیونکہ… کیونکہ وزیر دفاع کا کہنا ہے کہ وہ دن دور نہیں ہے… بالکل بھی نہیں ہے… اس لئے صاحبان آپ آج سے ہی تیاری پکڑ لیجئے … استقبال کی تیاری کہ جو لوگ ہم سے جڑنے والے ہیں … وہ غیر نہیں ہیں ‘ وہ ہمارے اپنے ہیں … جنہیں ہم سے جدا کر دیا گیا تھا… زبردستی جد اکر دیا گیا تھا … لیکن وہ کہتے ہیں نا کہ اللہ میاں کے ہاں دیر ہے ‘ اندھیر نہیں … اور دیکھئے اب وہ دن بھی آنے والا ہے … جس کا ہم سب کو انتظار تھا… آپ کو انتظار تھا یا نہیں … لیکن ہمیں انتظار تھا… اُس دن سے انتظار تھا جس دن سے راج ناتھ جی نے کہا تھا… یہ خوشخبری سنا دی تھی کہ پاکستان کے زیر قبضہ کشمیر کو حاصل کیا جائیگا … وہ بھی ہمارا حصہ بن جائیگا … رضاکارانہ طور پر بن جائیگا کیونکہ … کیونکہ مودی ہے توممکن ہے ۔ ہے نا؟
’مقبوضہ کشمیر اب ہمارا ہو گا‘
