جموں میں جان لیوا سسٹنٹ کرنے کے الزام میں ایک مقبول یو ٹیوبر گرفتار

سرینگر//
ٹریفک پولیس جموں نے جان لیوا سٹنٹ کرنے ،جانوں کو خطرے میں ڈالنے اور نوجوانوں میں خطرناک رویے کو فروغ دینے کے الزام میں ایک مقبول یو ٹیوبر اور سٹنٹ بائیکر کو گرفتار کیا۔
گرفتار شدہ کی شناخت جتندر شرما عرف جانو کے طور پر کی گئی ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ جموں ٹریفک پولیس نے جتیندر شرما ولد نریندر شرما ساکن گاندھی نگر جموں کو جمعہ کے روز گرفتار کیا۔
ترجمان نے کہا’’وہ خاص طور پر سدھرا فلائی اوور پر اپنی بائیک پر خطرناک سٹنٹ کرنے کیلئے مشہور تھا‘‘۔ان کا کہنا ہے’’جتیندر عرف جانو، جو’موٹو وی لاگر جانو سٹنٹس‘کے نام سے ایک یو ٹیوب چینل چلاتا ہے جس کے۲۰لاکھ فالوورز ہیں، کو ماضی میں عوام کی طرف سے رپورٹ کیا گیا کہ وہ نہ صرف اپنی جان کو خطرے میں ڈال رہا ہے بلکہ سدھرا بائی پاس، رنگ روڈ، جموں،سانبا روڈ وغیرہ سمیت مختلف شاہراہوں پر بہت سے راہگیروں کی جان بھی خطرے میں ڈال رہا ہے‘‘۔
بیان میں کہا گیا’’اتنے بڑے پیمانے پر فالوونگ کے ساتھ اپنے یوٹیوب چینل کے ذریعے ، وہ جموں و کشمیر اور دیگر جگہوں پر نوجوانوں کو ’متاثر‘کر رہا تھا تاکہ وہ اس طرح کے طریقوں میں ملوث ہوں‘‘۔
ترجمان نے کہا’’اس کے خلاف ایف آئی آر نمبر۲۰۲۵/۱۰۴سیکشن۱۲۵/۲۸۱بی این ایس کے تحت پولیس اسٹیشن نگروٹہ جموں میں درج کیا گیا ہے ‘‘۔
ٹریفک پولیس سٹی جموں نے لوگوں بالخصوص والدین سے اپیل کی ہے کہ وہ اپنے بچوں کو اس طرح کے جان لیوا حرکات سے پرہیز کرنے اور لاپرواہی سے باز رہنے کی تلقین کریں نیز کوئی بھی شخص ایسی سرگرمی میں ملوث پائے جانے کی اطلاع ایس ایس پی ٹریفک سٹی جموں کی سرکاری میل آئی ڈی) پر دیں۔انہوں نے کہا کہ ایسی خلاف ورزی کرنے والوں کے خلاف اسی طرح کی کارروائی جاری رکھی جائے گی۔