سرینگر/۱۷مئی
سرینگر، وزیراعلیٰ عمر عبداللہ نے ہفتہ کے روز کہا کہ سیاحت کو کافی نقصان پہنچا ہے، حکومت اب امرناتھ یاترا پر توجہ مرکوز کر رہی ہے اور چاہتی ہے کہ یہ سالانہ مقدس سفر امن سے گزرے۔
صحافیوں سے بات کرتے ہوئے، عمر نے کہا کہ سیاحت پر کافی برا اثر پڑا ہے اور اس موسم گرما میں یہاں کوئی سیاح نہیں آ رہا ہے۔”ہم اب امرناتھ یاترا پر مرکوز ہیں اور چاہتے ہیں کہ ہر یاتری یہاں سے محفوظ اور تندرست روانہ ہو“۔
وزیر اعلیٰ نے کہا ”ہم امن و سکون کے ساتھ ہونے والی سالانہ یاترا چاہتے ہیں اور بعد میں ہم یہ دیکھیں گے کہ ہم سیاحت کو فروغ دینے کے لئے کیا کر سکتے ہیں“۔
عمرعبداللہ نے مزید کہا کہ جنگ بندی برقرار ہے اور کنٹرول لائن اور سرحد سے کسی بھی خلاف ورزی کی کوئی اطلاع نہیں ملی ہے۔ ”اس وقت نقصان کا تخمینہ لگایا جا رہا ہے۔ جب ہمیں رپورٹ مل جائے گی تو متاثرہ لوگوں کو معاوضہ فراہم کیا جائے گا“۔
انہوں نے کہا”جہاں ضرورت ہو گی، ہم مرکزی حکومت کی مدد حاصل کریں گے“۔
علاوہ ازیں، وزیراعلیٰ نے مختلف ممالک کا دورہ کرنے والی تمام جماعتوں کے وفد پر ردعمل دیتے ہوئے کہا”اٹل بہاری واجپائی جی کی مدت کے دوران، اسی قسم کا وفد پارلیمنٹ کے حملے کے بعد کئی ممالک میں بھیجا گیا تھا۔ یہ ایک بار پھر بھارت کا موقف پیش کرنے کا اچھا موقع ہے۔“
