بھارت نے اپنی فضائی حدود پاکستانی پروازوں کیلئے بند کی

سرینگر//
بھارت نے پاکستانی پروازوں کیلئے اپنی فضائی حدود بند کرنے کا اعلان کر دیا ہے۔
خبر رساں ادارے پریس ٹرسٹ آف انڈیا (پی ٹی آئی) کے مطابق ہندوستانی حکام کا کہنا ہے کہ اس پابندی کا اطلاق یکم مئی سے۲۳ مئی تک ہوگا۔ بدھ کے روز ایئرپورٹس اتھارٹی آف انڈیا نے اس ضمن میں ایک نوٹم بھی جاری کر دیا ہے۔
نوٹم یا نوٹس کو ایئرمین پائلٹوں اور دیگر فضائی صارفین کو ممکنہ خطرات یا پرواز کے راستے یا کسی مخصوص مقام پر ہونے والی تبدیلیوں کے بارے میں آگاہ کرنے کیلئے جاری کیا جاتا ہے۔
بھارت کی جانب سے عائد کردہ پابندی کا مطلب یہ ہے کہ پاکستانی رجسٹرڈ طیاروں اور وہ طیارے جو پاکستانی ایئرلائنز یا آپریٹرز کی طرف سے چلائے جاتے ہیں، اْن کی ملکیت ہیں یا اْن کی جانب سے لیز کیے گئے ہیں، اْن تمام طیاروں کے لیے بھارت کی فضائی حدود دستیاب نہیں ہو گی۔
پاکستانی ایئر لائنز سنگاپور، ملائیشیا اور دیگر مشرقی ایشیائی ممالک جانے کے لیے انڈیا کی فضائی حدود استعمال کرتی ہیں۔
ایک سینئر سرکاری عہدیدار نے پی ٹی آئی کو بتایا کہ اس پابندی کا اطلاق پاکستان کے فوجی جہازوں پر بھی ہوگا۔
خیال رہے کہ اس سے قبل پہلگام حملے کے بعد نئی دہلی کی طرف سے پانی کی منصفانہ تقسیم کے لیے طے شدہ سندھ طاس معاہدے کی معطلی، اٹاری بارڈر کی بندش سمیت دیگر اقدامات کے جواب میں پاکستان نے بھارتی پروازوں کے لیے اپنی فضائی حدود بند کر دی تھیں۔