بارہمولہ، کپوارہ اور اکھنور سیکٹروں میں پاکستانی فوج کی بلا اشتعال فائرنگ

سرینگر//
فوجی ذرائع کا کہنا ہے کہ پاکستانی فوج نے مسلسل پانچویں بار جنگ بندی معاہدے کی خلاف ورزی کرکے جموں و کشمیر کے کپوارہ، بارہمولہ اضلاع اور اکھنور سیکٹرمیں لائن آف کنٹرول (ایل او سی) پر بلا اشتعال چھوٹے ہتھیاروں سے فائرنگ کی جس کا موثر انداز میں جواب دیا گیا۔
ایک فوجی ترجمان نے بتایا’’۲۸؍اور۲۹؍اپریل ۲۰۲۵کی درمیانی شب پاکستانی فوج نے لائن آف کنٹرول کے پار کپوارہ اور بارہمولہ اضلاع کے ساتھ ساتھ اکھنور سیکٹر میں بلا اشتعال چھوٹے ہتھیاروں سے فائرنگ کی‘‘۔
ترجمان نے کہا کہ وہاں تعینات فوجی جوانوں نے اس اشتعال انگیزی کا موثر انداز میں جواب دیا۔تاہم کسی بھی جانب کسی جانی نقصان کی کوئی اطلاع نہیں ہے ۔
قابل ذکر ہے کہ ایل او سی کے ساتھ فائرنگ کا تبادلہ ۲۲؍اپریل کو پہلگام میں بہیمانہ دہشت گردانہ حملے کے بعد ہندوستان اور پاکستان کے درمیان بڑھتی ہوئی کشیدگی کے درمیان ہوا تھا جس میں۲۵سیاحوں اور ایک مقامی باشندے کی موت ہوئی تھی۔
پہلگام حملے کے بعد، آرمی چیف جنرل اوپیندر دویدی نے جمعہ کو سری نگر کا دورہ کیا اور جموں اور کشمیر میں سیکورٹی کی صورتحال کا جائزہ لیا۔
ہندوستان اور پاکستان کے درمیان بڑھتی ہوئی کشیدگی کے پیش نظر جموں خطے میں بین الاقوامی سرحد (آئی بی) اور لائن آف کنٹرول (ایل او سی) کے قریب واقع دیہات میں رہنے والے لوگ زیر زمین بینکروں کی صفائی، کھیتوں کی فصلیں کاٹنے اور کسی بھی ممکنہ صورتِ حال کا سامنا کرنے کے لیے خود کو تیار کر رہے ہیں۔
مقامی لوگوں کا کہنا ہے کہ کسی کو معلوم نہیں کہ اگلا لمحہ کیا لائے گا، ہم نے فیصلہ کیا ہے کہ زیر زمین بینکروں کی صفائی کریں تاکہ خدا نخواستہ گولہ باری یا فائرنگ کی صورت میں ہم اپنی جانیں بچا سکیں۔
واضح رہے کہ ہندوستان اور پاکستان کے درمیان مجموعی طور پر۳۳۲۳کلومیٹر طویل سرحد قائم ہے ، جس میں سے ۲۲۱کلومیٹر بین الاقوامی سرحد (آئی بی) اور۷۴۴کلومیٹر لائن آف کنٹرول (ایل او سی) جموں و کشمیر میں واقع ہے ۔