شمالی ریلوے حکام کا سرینگر سے کٹرا تک ٹرین کے ٹریک کا معائنہ

سرینگر//
کشمیر کیلئے وندے بھارت ٹرین کے آغاز سے پہلے شمالی ریلوے کے جنرل منیجر اشوک کمار ورما نے جمعہ کے روز سری نگر سے کٹرہ تک اپنے دورے کے دوران اس اسپیشل ٹرین کے ٹریک کا معائنہ کیا۔
وزیر اعظم نریندر مودی۱۹؍اپریل کو اس ٹرین سروس کا افتتاح کریں گے ۔
ذرائع نے بتایا کہ جنرل منیجر اشوک کمار ورما کی قیادت میں ایک ٹیم نے سری نگر سے کٹرا تک ایک ریل کار میں اس خصوصی ٹرین کے ٹریک کا معائنہ کیا۔
ورمانے کہا کہ اس ٹیم نے اس دوران ٹریک کے معائنے کے ساتھ بڑے اسٹیشنوں پر وندے بھارت ٹرین کیلئے کئے جانے والے انتظامات کا جائزہ لیا۔
ریلوے ذرائع نے بتایا’’اعلیٰ عہدیدار نے۱۹؍اپریل کو ہونے والی کشمیر ریل سروس کی افتتاحی تقریب کے لیے کئی ریلوے اسٹیشنوں پر انتظامات کا بھی جائزہ لیا‘‘۔
جنرل منیجر گذشتہ روز ایک روزہ دورے پر سری نگر پہنچے تھے ۔
یہ وندے بھارت ٹرین دہلی سے سری نگر تک کے۸سو کلومیٹر فاصلے کو ۱۳گھنٹوں میں طے کرے گی۔یہ ٹرین شری ماتا ویشنو دیوی کٹرہ سے سری نگر کے درمیان۱۹۰کلو میٹر کے فاصلے کو۳گھنٹوں میں طے کرے گی اور اس دوران یہ ٹرین بعض اہم اسٹیشنوں پر رکے گی۔اس ٹرین کو وادی کشمیر کے سرد موسمی حالات کو مدنظر رکھتے ہوئے ڈیزائن کیا گیا ہے ۔
اس ٹرین میں جو کلیدی خصوصیات موجود ہیں ان میں پانی اور بائیو ٹوائلٹ ٹینک کو جمنے سے روکنے کے لیے جدید ترین حرارتی نظام، ویکیوم سسٹمز کے لیے گرم ہوا، اور زیرو زیرو درجہ حرارت میں ہموار آپریشن کے لیے بہتر ایئر بریک کی فعالیت شامل ہیں۔
علاوہ ازیں وندے بھارت ٹرین میں تمام معیاری سہولیات جیسے مکمل طور پر ایئر کنڈیشنڈ کوچز، خودکار پلگ دروازے ، اور موبائل چارجنگ ساکٹ بھی موجود ہیں۔
حکام کا کہنا ہے کہ وادی کشمیر کو قومی ریلوے نیٹ ورک سے جوڑ کر یہ ٹرین ادھم پور، سرینگر، بارہمولہ ریل لنک (یو ایس بی آر ایل) پروجیکٹ پر عالمی معیار کا سفری تجربہ ہے ۔
انہوں نے کہا کہ یہ پروجیکٹ جغرافیائی اور اقتصادی خلا کو ختم کرنے کیلئے ہندوستان کے عزم کو واضح کرتی ہے ۔
شری ماتا ویشنو دیوی کٹرا کو دہلی سے جوڑنے والے دو کامیاب راستوں کے بعد شمالی ریلوے زون کے ذریعے چلائی جانے والی یہ خطے کیلئے تیسری وندے بھارت ٹرین ہے ۔
قابل ذکر ہے کہ ریلوے نے۲۷۲کلو میٹروں پر محیط اودھم پور،سرینگر، بارہمولہ ریل لنک (یو ایس بی آر ایل) پروجیکٹ کو مکمل کیا ہے ۔