کشمیر کے پہاڑی علاقوں‘ سونہ مرگ زوجیلا پرآج بررفباری کا امکان

سرینگر//
خشک و خوشگوار موسم کے بیچ محکمہ موسمیات نے وادی کشمیر میں۳؍اپریل کی دوپہر کو شمالی کشمیر کے پہاڑی علاقوں اور سونہ مرگ زوجیلا ایکسز پر ہلکی برف باری کی پیش گوئی کی ہے ۔
موسمیات محکمے کے ایک ترجمان نے بتایا کہ وادی میں۳؍اپریل کی دوپہر کو موسم ابر آلود رہ سکتا ہے اور اس دوران شمالی کشمیر کے پہاڑی علاقوں اور سونہ مرگ ، زوجیلا ایکسز پر ہلکی برف باری ہونے کا امکان ہے ۔
ترجمان نے کہا کہ وادی میں۴سے۷؍اپریل تک موسم مجموعی طور پر خشک رہ سکتا ہے ۔ان کا کہنا ہے بعد میں۸؍اپریل کو ایک بار پھر دوپہر کے بعد موسم ابر آلود رہ سکتا ہے اور اس دوران ایک بار پھر شمالی کشمیر کے پہاڑی علاقوں اور سونہ مرگ ، زوجیلا ایکسز پر ہلکی برف باری ہونے کا امکان ہے ۔
ترجمان نے بتایا کہ وادی میں۹؍اور۱۰؍اپریل کو موسم ابر آلود رہنے کے ساتھ پہاڑی علاقوں میں کہیں کہیں ہلکی برف باری یا بارشیں متوقع ہیں جبکہ اس دوران جموں صوبے میں بھی الگ الگ مقامات پر ایسا ہی موسم متوقع ہے ۔
انہوں نے کہا کہ۱۱؍اپریل کو بھی موسم عام طور پر ابر آلود رہ سکتا ہے اور اس دوران صبح کے وقت پہاڑی علاقوں میں چند ایک مقامات پر ہلکے درجے کی برف باری یا بارشوں کا امکان ہے ۔
محکمے نے اپنی ایڈوائزری میں مسافروں، سیاحوں اور ٹرانسپورٹرں سے کہا ہے کہ وہ ٹریفک ایڈوائزری پر عمل کریں۔کسانوں سے اپنے کھیت کھلیانوں اور باغوں میں آپریشنز جاری رکھنے کو کہا گیا ہے ۔
دریں اثنا وادی کشمیر کے بیشتر مقامات پر شبانہ درجہ حرارت معمول سے ۱سے۲ڈگری سینٹی گریڈ کم ریکارڈ ہوا ہے ۔
وادی میں سیاحتی مقامات گلمرگ اور پہلگام سرد ترین علاقے رہے ہیں جہاں شبانہ درجہ حرارت منفی۴ء۰ڈگری سینٹی گریڈ ریکارڈ ہوا ہے جبکہ جموں صوبے میں بانہال سب سے سرد علاقہ رہا ہے جہاں کم سے کم درجہ حرارت۵ء۵ڈگری سینٹی گریڈ ریکارڈ ہوا ہے ۔