کٹھوعہ جھڑپ میں شہید پولیس اہلکاروں کے رشتہ داروں کو نوکریاں

جموں//
مرکزی وزیر ڈاکٹر جتیندر سنگھ نے اتوار کے روز کٹھوعہ ضلع میں انکاؤنٹر کے دوران شہید ہونے والے دو پولیس اہلکاروں جسونت سنگھ اور بلوندر سنگھ کے اہل خانہ سے ملاقات کی اور ان کے رشتہ داروں کو سرکاری نوکری دینے کا اعلان کیا۔
سنگھ نے فی کنبہ۷۰ لاکھ روپے تک کی مالی امداد اور ایم پی فنڈ سے ایک میموریل گیٹ کا بھی اعلان کیا۔
لونڈی اور کننا چک میں اہل خانہ سے ملاقات کرتے ہوئے وزیر نے کہا کہ پولیس اہلکاروں کی بیویوں کو ایس آر او کی دفعات کے تحت سرکاری نوکری ملے گی۔
سنگھ نے کہا’’ان فوری اقدامات کے علاوہ، سرکاری اسکولوں کا نام شہدا کے نام پر رکھنے کی تجویز پیش کی جائے گی تاکہ ان کی قربانیوں کو دیرپا خراج عقیدت پیش کیا جا سکے‘‘۔
سنگھ اس انکاؤنٹر کے وقت اوڈیشہ میں تھے جس میں ان کے پارلیمانی حلقہ کے دو پولیس اہلکار شہید ہوگئے تھے۔
مرکزی وزیر نے اودھم پور ضلع کے مجالٹہ جانے سے پہلے ان کے اہل خانہ سے ملاقات کی، جہاں وہ ایک نئے پل کا سنگ بنیاد رکھیں گے۔
انہوں نے کہا’’اس منصوبے کا مقصد خطے میں رابطے کو بڑھانا اور بنیادی ڈھانچے کو بہتر بنانا ہے، جو ترقی اور عوامی فلاح و بہبود کے لئے حکومت کے عزم کی عکاسی کرتا ہے‘‘۔
سنگھ نے کہا کہ ملک اپنی سکیورٹی فورسز کا شکر گزار ہے کیونکہ انہوں نے شہید جوانوں کو خراج عقیدت پیش کیا۔
کٹھوعہ ضلع کے دو بیٹے شہید ہوئے۔ ’’میں یہاں ان کے اہل خانہ سے تعزیت کرنے آیا تھا۔ یہ وہ خاندان ہیں جنہوں نے نہ صرف نسلوں سے مادر وطن کا دفاع کیا ہے بلکہ عظیم قربانیاں بھی دی ہیں‘‘۔
ان کاکہنا تھا’’ایسے ہی ایک خاندان کو برطانوی دور میں بہادری کے اعتراف میں وکٹوریہ کراس سے بھی نوازا گیا تھا‘‘۔
انہوں نے مزید کہا’’جسونت کی بیوی ایم اے بی ایڈ ہے، اور بلوندر کی بیوی نے ۱۲ویں کلاس مکمل کر لی ہے۔ اس کے مطابق مناسب ملازمتیں فراہم کی جائیں گی‘‘۔
’’ایک رکن پارلیمنٹ کی حیثیت سے میں دونوں شہیدوں کی یادگاروں کی تعمیر کا اعلان کرتا ہوں۔ مزید برآں، جیسا کہ پہلے بھی کیا جا چکا ہے، کچھ اسکولوں کے نام ان کے اعزاز میں رکھے جائیں گے، ہم اس کی تجویز پیش کریں گے۔‘‘ (ایجنسیاں)