اے اے سی پر پابندی پوری جانچ کے بعد لگا دی گئی:بی جے پی

جموں//
بی جے پی کے لیڈر آف اپوزیشن سنیل شرما نے وزارت داخلہ کی طرف سے عوامی ایکشن کمیٹی اور اتحاد المسلین پر پابندی عائد کرنے کو ایک خوش آئند قدم قرار دیا ہے ۔
شرما نے کہا کہ ان جماعتوں پر یہ پابندی پوری جانچ کے بعد غیر قانونی سرگرمیاں (روک تھام) ایکٹ (یو اے پی اے ) کے تحت لگا دی گئی ہے ۔
واضح رہے کہ مرکزی حکومت نے میر واعظ عمر فاروق کی قیادت والی عوامی ایکشن کمیٹی اور مولانا مسرور عباس انصاری کی قیادت میں چلنے والی اتحاد المسلمین پر غیر قانونی سرگرمیاں (روک تھام) ایکٹ۱۹۶۷کے تحت پانچ سال کی پابندی عائد کر دی۔
بی جے پی لیڈر نے بدھ کے روز ان پابندیوں کے بارے میں پوچھے جانے والے ایک سوال کے جواب میں میڈیا کو بتایا’’پوری جانچ کے بعد ان جماعتوں پر یہ پابندی یو اے پی اے کے تحت لگادی گئی جو ایک خوش آئند بات ہے ‘‘۔
شرما نے کہا’’بھارت سرکار کسی بھی قیمت پر قانون مخالف جماعتوں کو اجازت نہیں دے گی اور جو جماعت ملک کو چلینج کرے گی اس پر پابندی لگا دی جائے گی‘‘۔
محبوبہ مفتی کے اس پابندی کے متعلق ایک بیان کے بارے میں سنیل شرما نے کہا’’پی ڈی پی کی بنیاد علیحدگی پسندی سے جڑی ہوئی ہے جب حکومت ایسی جماعتوں پر پابندی لگا دیتی ہے تو محبوبہ مفتی کا درد ٹویٹ کی صورت میں یا زبانی سامنے آجاتا ہے ‘‘۔
شرما نے کہا’’یہاں کوئی کچھ بھی بولے لیکن ملک قانون کے مطابق چلے گا۔‘‘