جموں//
وزیر اعلیٰ عمر عبداللہ نے آج کہا کہ لائن آف کنٹرول (ایل او سی) اور بین الاقوامی سرحد پر جنگ بندی سے سرحدی علاقوں میں سیاحتی سرگرمیاں دوبارہ بحال ہوئی ہیں۔
وزیر اعلیٰ‘ جن کے پاس سیاحت کا قلمدان بھی ہے، نے رُکن قانون ساز سجاد شفیع کی جانب سے اَپنے حلقہ اوڑی کے بارے میں اُٹھائے گئے ایک ضمنی سوال کا جواب دیتے ہوئے ایوان کو بتایا کہ ایل او سی او رسرحد پر جنگ بندی کے بعد سرحدی علاقے آہستہ آہستہ کھل رہے ہیں۔ اس لئے خطے میں موجودہ امن کی وجہ سے سیاحت میں مثبت رجحان دیکھنے کو مل رہا ہے۔
وزیر اعلیٰ نے کہا ’’یہ سچ ہے کہ اوڑی میں سرحدی سیاحت کے وسیع امکانات ہیں۔ سیاح اوڑی جیسے علاقوں کا دورہ کر رہے ہیں اور امن سیتو اور دیگر خوبصورت مقامات کا دیکھنے کیلئے بے تاب ہیں۔ ہماری ترجیح ان علاقوں میں سیاحتی بنیادی ڈھانچے کو بہتر بنانا ہے ‘‘۔
عمر عبداللہ نے رُکن اسمبلی کے ایک سوال کے جواب میں بتایا کہ لگاما سے بابا فرید گرکوٹ اوڑی حلقہ میں زِپ لائن یا کیبل کار پروجیکٹ کے قیام کے امکان کا جائزہ سیاحت محکمہ لے گا لیکن فی الحال ایسا کوئی منصوبہ زیر غور نہیں ہے۔
وزیر اعلیٰ نے مزید کہا کہ رستم اور نمبلہ آبشار جیسے مقامات کو ’بارڈر ٹوراِزم پروگرام‘ میں شامل کرنے پر مستقبل میں غوروخوض کیا جائے گا بشرطیکہ یہ ممکن ہو اور وسائل دستیاب ہوں۔
عمر عبداللہ نے مہم جو سیاحت کی اہمیت کو اُجاگر کرتے ہوئے بتایا کہ بیجھم اور لمبر آبشار،لمبر وائلڈ لائف سینکچری اپنی مہماتی خصوصیات کی وجہ سے سیاحوں کو اَپنی طرف راغب کرتی ہیں۔
وزیر اعلیٰ نے کہا کہ سیاحتی محکمہ نے ان علاقوں کی مجموعی ترقی کے کئے متعدد کئی اقدامات کئے ہیں۔
عمر عبداللہ نے وضاحت کی کہ اگرچہ محکمہ براہ راست پیراگلائیڈنگ سرگرمیاں نہیں چلاتا، لیکن پرائیویٹ ایڈونچر ٹوراِزم آپریٹروںکے ذریعے اس کی سہولیت فراہم کرتا ہے۔
مزیدبرآں‘خواہشمند ٹرینروں کیلئے صلاحیت سازی کے پروگرام منعقد کئے جاتے ہیں اور فزیبلٹی سروے کے بعدپیرا گلائیڈنگ کی اِجازت دی جاتی ہے ۔
وزیر اعلیٰ نے کیمپنگ سہولیات کے بارے میں بتایا کہ محکمہ سیاحت دریائے جہلم کے کنارے گانٹمولہ ریزروائرمیں کیمپنگ کالونیوں کے قیام کیلئے سہولیت فراہم کرتا ہے اور اِجازت دیتا ہے ۔
حکومت نے پہلے ہی بارہمولہ سے سلام آباد، اوڑی جانے والے سیاحوں کیلئے اہم سیاحتی سہولیات تیار کر لی ہیں جن میں کھڈین یار پارک کی ترقی، بونیار میں ایک سیاحتی کیفے ٹیریا اورٹی آئی سی،اوڑی کے سلام آباد میں ایک سیاحتی کیفے ٹیریااور سلام آباد میں ایک ٹورسٹ ریسپشن سینٹر کی ترقی شامل ہے۔اِس کے علاوہ ایکو پارک کھڈین یار میں تباہ شدہ کیفے ٹیریا کی تعمیر نو کی گئی ہے ۔
