کٹھوعہ ہلاکتوں اور گلمرگ فیشن شو پر اسمبلی میں ہنگامہ آرائی

جموں//
جموں وکشمیر قانون ساز اسمبلی میں پیر کے روز کٹھوعہ شہری ہلاکتوں اور گلمرگ فحش فیشن شو پر ہنگامہ خیز مناظر دیکھے گئے ۔
ایوان میں پیر کی صبح جوں ہی سوالات کا سیشن شروع ہوا تو ارکان اسمبلی اپنی نشستوں سے کھڑے ہوئے اور بلاور شہری ہلاکتوں پر بحث کا مطالبہ کیا۔
اس دوران بنی کے رکن اسمبلی ڈاکٹر رامیشور سنگھ‘ جن پر ہفتے کو حملہ ہوا‘نے ایوان کے وسط میں جانے کی کوشش کی تاہم وہاں تعینات مارشلز نے انہیں روکا۔
اس ہنگامہ آرائی کے دوران اسپیکر عبدالرحیم راتھر نے بار بار ارکان اسمبلی کو خاموش ہونے اور اپنی سیٹوں پر بیٹھنے کی ہدایت دی لیکن انہوں نے اپنا احتجاج جاری رکھا۔
ایوان میں مسلسل خلل کی وجہ سے انہوں نے کہا’ایوان بلاور قتل پر بحث نہیں کرسکتا کیونکہ یہ اسمبلی کے دائرہ اختیار سے باہر ہے ‘‘۔
راتھر نے جموں و کشمیر ری آرگنائزیشن ایکٹ ۲۰۱۹کے سیکشن ۳۲کا حوالہ دیتے ہوئے کہا کہ پولیس اور عوامی نظم ونسق اسمبلی کے دائرہ سے باہر آتے ہیں۔
اسپیکر نے کہا کہ لیفٹیننٹ گورنر نے پہلے ہی اس معاملے کی تحقیقات کا حکم دے دیا ہے ۔
راتھر نے کہا کہ وزیر اعلیٰ عمر عبداللہ نے بھی گلمرگ فیشن شو کی تحقیقات کا حکم دیا ہے ۔انہوں نے مزید کہا کہ اس پر بحث نہیں کی جا سکتی کیونکہ زیر تفتیش معاملات ایوان میں نہیں اٹھائے جا سکتے ۔
اسپیکر نے کہا کہ ایوان بنی کے رکن اسمبلی ڈاکٹر رامیشور سنگھ پر ہوئے حملے کی مذمت کرتا ہے اور اس کی مکمل انکوائری ہونی چاہئے ۔
واضح رہے کہ کٹھوعہ کے بلاور میں ہفتے کو تین شہریوں کی لاشیں بر آمد کی گئیں جو ایک شادی کی تقریب میں شرکت کرنے کے دوران لاپتہ ہوئے تھے ۔
لیفٹیننٹ گورنر منوج سنہا نے اس واقعے کی مکمل اور شفاف تحقیقات کرنے کے احکامات صادر کئے ہیں۔
ادھر اتوار کے گلمرگ میں ایک فیش شو منعقد ہوا جس پر یہاں سیاسی، مذہبی اور سماجی حلقوں میں شدید غم و غصہ پایا گیا۔وزیر اعلیٰ نے اس کا نوٹس لے کراس شو پر تحقیقات کا حکام دیا ہے ۔
ادھرصحت اور تعلیم کی وزیر سکینہ یتو نے گلمرگ فیشن شو کی مذمت کرتے ہوئے کہا ہے کہ اس شو کے ذمہ داروں کے خلاف کڑی کارروائی ہوگی۔
ایتو نے کہ اس قسم کی چیزیں ماہ رمضان المبارک میں ہی نہیں بلکہ کسی دوسرے مہینے میں نہیں ہونی چاہئے ۔
وزیر صحت نے ان باتوں کا اظہار پیر کو یہاں نامہ نگاروں کے ساتھ بات کرنے کے دوران کیا۔
ایتو نے کہا’’گلمرگ میں جو ہوا وہ غلط ہے ماہ رمضان کا متبرک مہینہ چل ہے اس میں ایسا نہیں ہونا چاہئے تھا بلکہ کسی دوسرے مہینے میں بھی نہیں ہونا چاہئے ‘‘۔ان کا کہنا تھا’’وزیر اعلیٰ نے اس میں تحقیقات کا حکم دیا ہے جو ذمہ دار ہیں ان کے خلاف کارروائی ہوگی‘‘۔
ایک سوال کے جواب کے ایتو نے کہا’’کوئی اس پر سیاست کرے یا نہ کرے لیکن یہ غلط ہوا ہے ایسا نہیں ہونا چاہئے ‘‘۔
کٹھوعہ واقعے پر دکھ کا اظہار کرتے ہوئے انہوں نے کہا’’بہت دکھ کی بات ہے لوگ دعویٰ کرتے ہیں اب یہاں یہ نہیں ہوتا ہے وہ نہیں ہوتا ہے لیکن جب ایسا ہوتا ہے تب بہت دکھ ہوتا ہے ۔‘‘