سرینگر/۲۱فروری
وادی کشمیر کے بارہمولہ اور سری نگر اضلاع میں آتشزدگی کی الگ الگ وارداتوں میں ایک 24 سالہ جسمانی طور معذور نوجوان کی جھلس کر موت واقع ہوئی جبکہ ایک کمرشل عمارت سمیت 5 رہائشی مکان خاکستر ہوگئے ۔
سرکاری ذرائع نے بتایا کہ بارہمولہ کے بنر بٹہ پورہ علاقے میں جمعرات اور جمعہ کی درمیانی شب ایک یک منزلہ مکان سے آگ نمو دار ہوئی۔
انہوں نے کہا کہ مکان میں ایک جسمانی طور معذور نوجوان پھنس گیا۔
ان کا کہنا تھا کہ آگ کے شعلے اس قدر تیز تھے کہ گھر والے لاکھ کاوشوں کے باوصف بھی اس کو باہر نہ نکال سکے جس کے نتیجے میں اس کی مکان میں ہی جھلس کر موت واقع ہوئی۔متوفی کی شناخت زبیر احمد کے طور پر کی گئی ہے ۔
حکام نے بتایا کہ متوفی کی لاش کو طبی و قانونی لوازمات کی ادائیگی کےلئے گورنمنٹ میڈکل کالج بارہمولہ منتقل کیا گیا ہے ۔انہوں نے کہا کہ آگ لگنے کی وجوہات معلوم کی جا رہی ہیں۔
دریں اثنا سری نگر کے بہوری کدل علاقے میں جمعہ کی علی الصبح آگ کی ایک اور واردات میں ایک پانچ منزلہ کمرشل عمارت سمیت5 رہائشی مکان خاکستر ہوگئے ۔
متعلقہ محکمے کے ایک عہدیدار نے بتایا کہ آگ کو قابو میں کرنے کے لئے فائر ٹنڈرس کو جائے واردات پر بھیج دیا گیا تاہم آگ کے شعلوں نے چشم زدن میں متصل واقع مکانوں کو اپنی لپیٹ میں لے لیا تھا۔انہوں نے کہا کہ آگ کو قابو میں کرکے مزید پھیلنے سے روک دیا گیا۔
ان کا کہنا تھا کہ آگ لگنے کی وجوہات معلوم کی جا رہی ہیں تاہم اس واردات میں کسی جانی نقصان کی کوئی اطلاع نہیں ہے ۔
