سرینگر؍۶ نومبر
اننت ناگ ویسٹ کے رکن اسمبلی عبدالمجید لارمی نے نیشنل کانفرنس (این سی) سے اپنی وفاداری کا اعادہ کرتے ہوئے کہا ہے کہ وہ جان دے سکتے ہیں، لیکن پارٹی سے رشتہ نہیں توڑیں گے۔
جمعہ کو یہاں پارٹی قیادت کے ساتھ میٹنگ کے بعد نامہ نگاروں سے بات کرتے ہوئے انہوں نے کہا کہ میٹنگ میں تمام معاملات طے پا گئے ہیں، تاہم ان کے حل میں کچھ وقت لگ سکتا ہے۔ واضح رہے کہ لارمی حالیہ کابینی توسیع میں وزارت نہ ملنے پر جذباتی ہو کر آبدیدہ ہو گئے تھے۔
لارمی نے کہا: ’’میٹنگ میں ہماری قیادت نے ہمارے خدشات کو درست تسلیم کیا اور یقین دہانی کرائی کہ انہیں بتدریج دور کیا جائے گا۔ ہمارے خدشات خواہ کسی محکمے سے متعلق تھے، کسی کو ہٹانے یا پارٹی کو مضبوط بنانے سے، منشور پر عمل درآمد سے یا دفعہ۳۷۰؍ اور۳۵؍اے کی بحالی کی جدوجہد جاری رکھنے سے، ان سب کو مان لیا گیا۔‘‘
پارٹی سے علیحدگی کے بارے میں پوچھے جانے پر لارمی نے کہا کہ کوئی بھی لیڈر پارٹی چھوڑنے والا نہیں ہے۔ انہوں نے کہا’’کوئی بھی لیڈر پارٹی چھوڑنے والا نہیں ہے۔ میں جان دے سکتا ہوں، لیکن اپنی پارٹی کو نہیں چھوڑوں گا۔‘‘
قابل ذکر ہے کہ عمر عبداللہ کی قیادت والی حکومت کی کابینہ میں حالیہ توسیع کے دوران نظر انداز کیے جانے پر مایوسی کا اظہار کرتے ہوئے لارمی نے کہا تھا کہ گزشتہ شام تک ان کا نام ممکنہ وزراء کی فہرست میں شامل تھا۔
لارمی نے کہا تھاکہ ’’میرا دل دکھ گیا ہے۔ میں اس کا حقدار تھا، یہ بات میں دو بار کہتا ہوں۔‘‘ تاہم ساتھ ہی انہوں نے یہ بھی کہا تھا کہ وہ پارٹی قیادت کے فیصلے کا احترام کرتے ہیں۔
۔۔۔۔۔
