اے اے پی کے تین کونسلر بی جے پی میں شامل

نئی دہلی// عام آدمی پارٹی (اے اے پی) کے تین کونسلر ہفتہ کو بھارتیہ جنتا پارٹی (بی جے پی) میں شامل ہوگئے ۔
دہلی بی جے پی کے صدر وریندر سچدیوا نے 14 پنت مارگ پر پارٹی ہیڈکوارٹر میں منعقدہ ایک تقریب میں اینڈریوز گنج سے کونسلر انیتا بسویا، آر کے پورم سے کونسلر دھرم ویر اور ہری نگر وارڈ نمبر 183 سے کونسلر نکھل چپرانا کو پارٹی میں شامل کیا۔ اس کے علاوہ اے اے پی کے کئی دوسرے لیڈر بھی شامل ہوئے ، جن میں سندیپ بسویا نمایاں ہیں۔ اے اے پی کے نئی دہلی ضلع کے سابق صدر مسٹر بسویا نے اپنے حامیوں کے ساتھ بی جے پی میں شمولیت اختیار کی۔
غور طلب ہے کہ ایم سی ڈی کے میئر کے عہدے کا انتخاب اپریل میں ہونا ہے اور بی جے پی پوری کوشش کر رہی ہے کہ اس بار میئر اس کی پارٹی کا ہو۔ ایم سی ڈی سے میئر کا آخری انتخاب نومبر 2024 میں ہوا تھا اور اس وقت اے اے پی کے مہیش کھنچی نے بی جے پی کے کشن لال کو تین ووٹوں سے شکست دی تھی۔ اس وقت کل 263 ووٹ ڈالے گئے ، جن میں سے مسٹر کھنچی کو 133، مسٹر لال کو 130 ووٹ ملے ، جب کہ دو ووٹوں کو باطل قرار دیا گیا۔
قابل ذکر ہے کہ ایم سی ڈی میں کونسلر کی کل 250 سیٹیں ہیں۔ ان میں سے 11 کونسلر ایم پی اور ایم ایل اے بن چکے ہیں۔ اس طرح اب کونسلروں کی تعداد 239 رہ گئی ہے ، جن میں سے 119 برسراقتدار اے اے پی کے ہیں۔ بی جے پی کے 113 کونسلر ہیں، جبکہ سات کونسلر کانگریس کے ہیں۔ اب اے اے پی کے ان تین کونسلروں کے جانے کے بعد اس کے کونسلروں کی کل تعداد کم ہو کر 116 ہو گئی ہے ۔ اس طرح بی جے پی اور اے اے پی کے کونسلروں کے درمیان فرق کم ہو کر صرف تین رہ گیا ہے ۔
اس موقع پر مسٹر سچدیوا نے کہا، "میں ان لوگوں کو تہہ دل سے خوش آمدید کہتا ہوں اور مبارکباد پیش کرتا ہوں جو ہمارے خاندان کا حصہ بن چکے ہیں۔ دہلی میں ڈبل انجن والی حکومت کے بارے میں مسلسل بات ہوتی رہی ہے ، لیکن اب لوگوں نے کہنا شروع کر دیا ہے کہ ہمیں ٹرپل انجن والی حکومت چاہیے ، کیونکہ ہم سب کو ایک خوبصورت، ترقی یافتہ دہلی بنانے کے لیے مل کر کام کرنا ہے ۔ ایک ایسی دہلی جس پر تمام دہلی والے فخر کر سکیں اور زندگی گزار سکیں۔”