’میرا دل کہتا ہے کہ وزیر اعظم بہت جلد ریاست کا درجہ بحال کرنے کا وعدہ پورا کریں گے‘

سونمرگ//
جموں کشمیر کے وزیر اعلی‘ عمر عبداللہ نے دل اور دہلی کے درمیان دوری کو کم کرنے اور مرکز کے زیر انتظام علاقے میں اسمبلی انتخابات کرانے کے لئے وزیر اعظم نریندر مودی کی کوششوں کی ستائش کی اور اس اعتماد کا اظہار کیا کہ ریاست کا درجہ بحال کرنے کا وعدہ جلد ہی پورا ہوجائے گا۔
گاندربل ضلع میں۵ء۶ کلومیٹر طویل زیڈ موڑ سرنگ کا افتتاح کرنے کے بعد ایک اجتماع سے خطاب کرتے ہوئے وزیر اعلی نے اپنی تقریر کا آغاز گزشتہ سال ۲۰؍ اکتوبر کو سرنگ کے مقام کے قریب دہشت گردانہ حملے میں ہلاک ہونے والے سات افراد کو خراج عقیدت پیش کرتے ہوئے کیا۔
عمرعبداللہ نے کہا کہ جموں کشمیر میں جمہوریت کے تحفظ کے علاوہ امن اور ترقی کو یقینی بنانے کیلئے دہشت گردی کو شکست دی جائے گی۔
وزیر اعلیٰ نے کہا’’وزیر اعظم! جب آپ تیسری مدت (عہدہ) حاصل کرنے کے بعد ایک پروگرام کے لئے سرینگر آئے تو لوگوں نے آپ کی باتوں پر یقین کرنا شروع کر دیا۔ آپ نے تین اہم چیزوں کے بارے میں بات کی جن میں’دل کی دوری اور دہلی سے دوری‘ کو ختم کرنے کی آپ کی کوششیں شامل ہیں، اور آپ نے اپنے کام سے یہ ثابت کیا ہے‘‘۔
عمرعبداللہ نے کہا کہ ۶جنوری کو دہلی سے ورچوئل طور پر علیحدہ جموں ریلوے ڈویڑن کا افتتاح کرنے کے ۱۵ دن کے اندر جموں و کشمیر میں یہ آپ کا دوسرا پروگرام ہے۔
وزیر اعظم مودی کی موجودگی میں جموں کشمیر کے وزیر اعلی نے کہا’’آپ نے چار ماہ کے اندر (اسمبلی) انتخابات کا وعدہ بھی کیا تھا اور آپ اپنی بات پر قائم رہے۔ لوگوں کو ووٹنگ میں حصہ لینے کا موقع ملا اور آج میں وزیر اعلی کی حیثیت سے اس پروگرام میں حصہ لے رہا ہوں‘‘۔انہوں نے کہا کہ یہ الیکشن صاف و شفاف تھے اور کسی بھی پولنگ مرکز پر دوبارہ ووٹنگ کرنے کی ضرورت نہیں پڑی ۔
وزیر اعلیٰ نے کہا کہ انتخابات کا سب سے بڑا مثبت پہلو یہ ہے کہ کہیں بھی دھاندلی، سرکاری مشینری کے غلط استعمال یا دوبارہ ووٹنگ کی کوئی ضرورت نہیں پڑی ہے اور اس کا سہرا آپ، آپ کی ٹیم اور الیکشن کمیشن آف انڈیا کو جاتا ہے۔
گزشتہ سال بین الاقوامی یوم یوگا کے موقع پر سرینگر کے دورے کے دوران مودی کی تقریر کا حوالہ دیتے ہوئے وزیر اعلیٰ نے کہا کہ میرا دل کہتا ہے کہ بہت جلد آپ جموں و کشمیر کے لوگوں سے کئے گئے اپنے تیسرے وعدے کو پورا کریں گے جو مرکز کے زیر انتظام علاقہ کا ریاستی درجہ بحال کرنا ہے۔
وزیر اعظم کی موجودگی میں وزیر اعلی کے ریاست کے بیان کا سامعین نے تالیاں بجا کر خیر مقدم کیا۔
تقریباً تین ماہ قبل عمر عبداللہ کی قیادت والی حکومت کی تشکیل کے بعد وزیر اعظم مودی کا جموں و کشمیر کا یہ پہلا دورہ تھا۔
عمرعبداللہ نے کہا کہ سونمرگ ٹنل جیسے پروجیکٹوں کا افتتاح یقینی طور پر جموں و کشمیر کے دل اور دہلی کے درمیان خلیج کو ختم کرے گا۔
وزیر اعلیٰ نے کہا کہ ان کے ساتھیوں سمیت لوگ ان سے ریاست کا درجہ بحال کرنے کے بارے میں پوچھتے ہیں۔’’ میں ان سے کہتا ہوں کہ وزیر اعظم نے انتخابات کا اپنا وعدہ پورا کیا ہے اور میرا دل کہتا ہے کہ بہت جلد آپ اپنا تیسرا وعدہ بھی پورا کریں گے اور جموں و کشمیر کو ایک بار پھر ریاست کا درجہ مل جائے گا‘‘۔
عمرعبداللہ نے ٹنل کے قریب گزشتہ سال ہوئے دہشت گردانہ حملے کے سات متاثرین کے نام پڑھ کر سنائے اور کہا کہ انہوں نے اس پروجیکٹ اور جموں و کشمیر اور ملک کی ترقی کے لئے اپنی جانوں کا نذرانہ پیش کیا۔انہوں نے کہا کہ میرا تعلق ایک ایسی سیاسی حکومت سے ہے جس کے ہزاروں رہنما اور کارکن گزشتہ ۳۵سالوں میں مارے گئے ہیں کیونکہ ہم تھے۔ ملک کو تقسیم ہوتے دیکھنے کیلئے تیار نہیں ہیں۔
وزیر اعلیٰ نے کہا کہ سرنگ کے افتتاحی پروگرام میں وزیراعظم کی موجودگی اس بات کا ثبوت ہے کہ حملہ کرنے والے اس خطے اور ملک کی ترقی نہیں چاہتے۔
ان کاکنا تھا’’وہ پرامن ماحول اور جمہوریت نہیں چاہتے۔ لیکن وہ کبھی کامیاب نہیں ہو سکتے۔ انہیں یہاں ہمیشہ شکست کا سامنا کرنا پڑے گا اور ہم انہیں جمہوریت کو نقصان پہنچانے کی اجازت نہیں دیں گے‘‘۔
عمرعبداللہ نے کہا کہ ٹنل کی تعمیر میں بہت سے چیلنجز تھے اور منصوبے پر کام بھی روک دیا گیا تھا۔انہوں نے کہا کہ جموں کشمیر کے عوام طویل عرصے سے اس ٹنل کا انتظار کر رہے ہیں۔ اس کی وجہ سے لوگوں کو نچلے حصوں میں نہیں آنا پڑے گا۔ ’’ہم سونمرگ کو ایک سیاحتی مقام کے طور پر ترقی دے سکیں گے اور یہ سرنگ زیر تعمیر زوجیلا ٹنل (لداخ کو ہر موسم میں رابطہ فراہم کرنے کے لئے) پر تیزی سے کام کرنے میں بھی سہولت فراہم کرے گی‘‘۔
وزیر اعلیٰ نے سرد موسم میں کشمیر کا دورہ کرنے پر وزیر اعظم مودی کا شکریہ ادا کیا اور کہا کہ ہمیں امید ہے کہ آپ بار بار آئیں گے اور ہماری خوشیوں میں شامل ہوں گے۔
وسطی کشمیر کے ضلع گاندربل میں گگن گیر اور سونمرگ کے درمیان دو لین کی دو سمتی سڑک سرنگ ۲۷۰۰ کروڑ روپے سے زیادہ کی لاگت سے تعمیر کی گئی ہے۔ یہ ہنگامی حالات کیلئے۵ء۷ میٹر چوڑے فرار کے متوازی راستے سے لیس ہے۔
سطح سمندر سے ۸۶۵۰ فٹ کی بلندی پر واقع یہ سرنگ لینڈ سلائیڈنگ اور برفانی تودے گرنے کے مقامات کو بالائے طاق رکھتے ہوئے سرینگر اور سونمرگ کے درمیان ہر موسم میں رابطے کو بہتر بنائے گی۔