اودھم پور بارہمولہ ریل لنک کاحفاظتی معائنہ شروع

دیشوال آج کٹرا،بانہال کی اسپیڈ ٹرائل سے قبل چناب پر بنے سب سے اونچے ریلوے پل کا دورہ کریں گے
جموں//
کمشنر آف ریلوے سیفٹی (ناردرن سرکل) دنیش چند دیشوال نے منگل کو اودھم پور،سرینگر،بارہمولہ ریلوے لنک (یو ایس بی آر ایل) پروجیکٹ کے ساتھ حال ہی میں مکمل ہونے والی ریلوے لائن کا دو روزہ قانونی معائنہ شروع کیا۔
وزیر ریلوے اشونی ویشنو نے گزشتہ ماہ ریاسی کٹرا سیکشن کی تکمیل کا اعلان کیا تھا، جو ایک اہم پیش رفت ہے جو تقریبا تین دہائیوں کے شاندار کام کے بعد کشمیر کو ملک کے باقی حصوں سے جوڑ دے گی۔
دیشوال کا یہ دورہ وزیر اعظم نریندر مودی کے نئی دہلی سے جموں ریلوے ڈویڑن کا ورچوئل افتتاح کرنے کے ایک دن بعد ہوا ہے، جس سے ہندوستان کے شمالی علاقے میں ٹرین خدمات کے موثر انتظام کی راہ ہموار ہوئی ہے۔
ریلوے حکام نے بتایا کہ سی آر ایس نے کٹراریاسی سیکشن کا قانونی معائنہ کیا اور آج صبح کٹرا پہنچنے کے فوراً بعد ریاسی ضلع میں ہندوستان کے پہلے کیبل اسٹیڈ ریل پل انجی کھڈ پل کا بھی دورہ کیا۔
عہدیداروں نے بتایا کہ دیشوال چہارشنبہ کی سہ پہر سی آر ایس اسپیشل کے ذریعہ کٹرا،بانہال کی اسپیڈ ٹرائل سے قبل دنیا کے سب سے اونچے ریلوے پل کوری میں چناب پر واقع محراب پل کا دورہ کریں گے۔
۴جنوری کو کٹرا،بانہال سیکشن پر ایک برقی ٹرین کا کامیاب آزمائشی سفر کیا گیا۔ ریلوے نے گزشتہ ماہ کے دوران ٹریک کے مختلف حصوں پر چھ تجربات کیے ہیں، جن میں انجی کھڈ پل اور چناب پل کے دو اہم سنگ میل بھی شامل ہیں۔
عہدیداروں نے کہا کہ سی آر ایس اپنے دو روزہ معائنے کے اختتام کے بعد ایک رپورٹ پیش کرے گا ، جو کشمیر کیلئے ٹرین خدمات شروع کرنے کے بارے میں مزید کارروائی کی رہنمائی کرے گی۔
کل ۲۷۲ کلومیٹر یو ایس بی آر ایل پروجیکٹ میں سے ۲۰۹ کلومیٹر مرحلہ وار شروع کیا گیا تھا جس میں۱۱۸ کلومیٹر قاضی گنڈ،بارہمولہ سیکشن کا پہلا مرحلہ اکتوبر ۲۰۰۹ میں شروع کیا گیا تھا، اس کے بعد جون ۲۰۱۳ میں۱۸کلومیٹر بانہال،قاضی گنڈ، جولائی ۲۰۱۴ میں۲۵ کلومیٹر اودھم پور،کٹرا اور پچھلے سال فروری میں۱ء۴۸ کلومیٹر طویل بانہال،سنگلدن حصہ شروع کیا گیا تھا۔
۴۶ کلومیٹر طویل سنگلدن،ریاسی سیکشن پر کام بھی پچھلے سال جون میں مکمل ہوا تھا ، جس سے ریاسی اور کٹرا کے درمیان کل ۱۷کلومیٹر کا حصہ باقی رہ گیا تھا اور یہ سیکشن بالآخر دسمبر ۲۰۲۴میں مکمل ہوا تھا۔
عہدیداروں نے کہا کہ کشمیر کو ٹرین کے ذریعے جوڑنے کا ڈریم پروجیکٹ ۱۹۹۷ میں شروع کیا گیا تھا اور ارضیاتی ، جغرافیائی اور موسمیاتی چیلنجوں کی وجہ سے کئی ڈیڈ لائنز سے محروم رہا ہے۔
وزیر اعظم‘ نریندر مودی نے پیر کو جموں ریلوے ڈویڑن کا ورچوئل افتتاح کرتے ہوئے اسے ایک تاریخی سنگ میل قرار دیا تھا۔
مودی نے کہا کہ جموں ریلوے ڈویڑن کا افتتاح جموں کشمیر کے قومی ریلوے نیٹ ورک میں انضمام کے ساتھ ساتھ جموں و کشمیر کے بنیادی ڈھانچے اور رابطے کی ترقی میں ایک تاریخی سنگ میل ہے۔
وزیر اعظم نے مزید کہا کہ جموں ڈویڑن کے افتتاح نے آخر کار ہندوستانی ریلوے کو ایک عالمی رہنما بنا دیا ہے۔
تقریب کے دوران قوم سے خطاب کرتے ہوئے وزیر اعظم مودی نے جموں و کشمیر کے عوام کو مبارکباد دیتے ہوئے کہا ’’جموں و کشمیر کا قومی ریلوے نیٹ ورک میں انضمام ہندوستانی ریلوے کو کارکردگی ، رفتار اور مسافروں کے تجربے میں عالمی رہنما میں تبدیل کرنے کی سمت میں ایک یادگار قدم ہے‘‘۔
ان کاکہنا تھا کہ اودھم پور،سرینگر،بارہمولہ ریلوے لنک (یو ایس بی آر ایل) پروجیکٹ ایک تاریخی کامیابی ہے جو ہندوستان کی انجینئرنگ کی مہارت کو ظاہر کرتی ہے۔