وزیر اعلی عمر عبداللہ نے جموں کے ایس وی ایم ایم چیریٹیبل ہاسپٹل امبفلہ میں ایم آر آئی ، سی ٹی اسکین سینٹر کا افتتاح کیا

جموں/۱۷ دسمبر
چیف منسٹر عمر عبداللہ نے آج جموں کے امپھلا میں سوامی وویکانند میڈیکل مشن (ایس وی ایم ایم) چیریٹیبل ہاسپٹل میں ایم آر آئی اور سی ٹی اسکین سینٹر کا افتتاح کیا۔
اس موقع پر رکن قانون ساز اسمبلی (اودھم پور ایسٹ) پون گپتا، صدر ایس وی ایم ایم چیریٹیبل ہاسپٹل انیل گپتا، سرپرست ڈاکٹر سبھاش گپتا، جموں چیمبر آف کامرس اینڈ انڈسٹری کے صدر ارون گپتا کے علاوہ اسپتال کی مینیجنگ کمیٹی کے ممبران، فیکلٹی، عملہ اور دیگر معززین موجود تھے۔
افتتاحی تقریب سے خطاب کرتے ہوئے وزیراعلیٰ نے عوام کے لئے غیر معمولی خدمات پر ہسپتال کی تعریف کی۔ انہوں نے کہا کہ ایس وی ایم ایم چیریٹیبل ہاسپٹل جیسے ادارے خدمت کے جذبے کی مثال ہیں، سستی اور معیاری صحت کی دیکھ بھال فراہم کرتے ہیں۔
عمر عبداللہ نے کہا’’یہ اسپتال اپنی خدمات کے لحاظ سے ایک نجی ادارے کی طرح کام کرتا ہے، لیکن سرکاری اسپتالوں سے بھی کم فیس وصول کرتے ہوئے سستی کو یقینی بناتا ہے‘‘۔
اسپتال کے سفر پر روشنی ڈالتے ہوئے وزیراعلیٰ نے ایک کمرے کی ڈسپنسری کے طور پر اس کے معمولی آغاز کا اعتراف کیا اور اس کے ایک معتبر صحت کی دیکھ بھال کے ادارے کے طور پر ارتقا ء کی تعریف کی۔ انہوں نے مزید کہا’’یہ تبدیلی واقعی قابل ذکر اور قابل ستائش ہے‘‘۔
وزیراعلیٰ نے ہسپتال کے نوزائیدہ سیکشن کو بھی سراہا اور اطمینان کا اظہار کیا کہ آئی سی یو میں بچوں کی صحت یابی کی شرح ۱۰۰ فیصد ہے۔ انہوں نے کہا’’یہ کامیابی نہ صرف اسپتال کے لئے بلکہ ان والدین کے لئے بھی اطمینان بخش ہے جن کے بچوں کا یہاں علاج کیا جا رہا ہے‘‘۔
اس موقع پر وزیراعلیٰ نے ہسپتال کا دورہ کیا، مختلف سیکشنز کا معائنہ کیا اور فیکلٹی ممبران اور مریضوں سے بات چیت کی اور ان کے تجربات اور خدشات کو سمجھا۔
انسانی خدمت کی اہمیت پر زور دیتے ہوئے عمر عبداللہ نے کہا کہ خدا کی خدمت کرنے کیلئے ہمیں انسانیت کی خدمت کرنی ہوگی۔
وزیراعلیٰ نے اسپتال کیلئے اپنی حکومت کی حمایت کا اعادہ کیا اور صحت کی دیکھ بھال کے اقدامات کو مزید مستحکم کرنے کے لئے اپنی انتظامیہ اور کابینہ کے ساتھیوں سے مدد کا وعدہ کیا۔