مرکو ریاستی درجے کی بحالی کا جلدازجلد فیصلہ لینا چاہئے :شرما

سرینگر//
ٹرانسپورٹ کے وزیر ستیش شرما کا کہنا ہے کہ وزیر اعظم نریندر مودی اور لیفٹیننٹ گورنر ہمیں با اختیار بنانا چاہتے ہیں۔
شرما نے امید ظاہر کی کہ ریاستی درجے کی بحالی کے لیے فوری اقدام کیے جائیں گے ۔
ان باتوں کا اظہار وزیر نے سرینگر میں نامہ نگاروں سے بات چیت کے دوران کیا۔
شرما نے کہاکہ جموںکشمیر کے لوگوں کو گزشتہ۳۰برسوں کے نامساعد حالات کی وجہ سے گونا گوں مشکلات کا سامنا کرنا پڑا۔
ٹرانسپورٹ کے وزیر نے کہاکہ عمر عبداللہ کی سربراہی میں موجودہ سرکار لوگوں کے مسائل ترجیحی بنیادوں پر حل کرنے کی بھر پور سعی کر رہی ہے ۔
شرما نے کہاکہ مرکزی سرکار کو جلد ازجلد ریاستی درجے کی بحالی کا فیصلہ لینا چاہئے کیونکہ اس وقت جموں کشمیر کو بہت سارے چیلنجوں کا سامنا ہے ۔انہوں نے کہا’’ہم زیادہ کچھ نہیں بلکہ جو ہم سے چھینا گیا وہ واپس دیا جائے ‘‘۔
ٹرانسپورٹ کے وزیر کا مزید کہنا تھا کہ وزیر اعظم نریندر مودی اور لیفٹیننٹ گورنر منوج سنہا ہمیں با اختیار بنانا چاہتے ہیں ۔ان کے مطابق ہم نے لوگوں سے وعدہ کیا ہے کہ ان کے جائز مسائل کو حل کیا جائے گا اور اس حوالے سے سرکار دن رات کام کر رہی ہیں۔
ہیلتھ سیکٹر کے بارے میں پوچھے گئے سوال کے جواب میں شرما نے کہاکہ جموں وکشمیر میں ہیلتھ سیکٹر میں کافی خامیاں پائی جارہی ہیں۔انہوں نے کہاکہ گزشتہ دس برسوں کے دوران جموں وکشمیر میں کیا کچھ ہوا یہ سب کے سامنے عیاں ہے ۔