لون موجودہ پولیس ویریفکیشن نظام کیخلاف عدالت سے رجوع کریں گے

سرینگر//
جموں کشمیر پیپلز کانفرنس کے صدر اور رکن اسمبلی ہندواڑہ سجاد لون نے کہا کہ پارٹی جموں کشمیر میں موجودہ پولیس ویریفکیشن نظام کو چیلنج کرنے کیلئے اگلے ہفتے سپریم کورٹ کا دروازہ کھٹکھٹائے گی۔
لون نے کہا کہ ان کی پارٹی کی قانونی ٹیم نے سابق سیکریٹری قانون اشرف میر کی سربراہی میں اور ایڈووکیٹ سجاد گیلانی کی نمائندگی کرتے ہوئے موجودہ پولیس ویریفکیشن نظام کو چیلنج کرنے کیلئے درخواست کے مسودے کو حتمی شکل دے دی ہے۔
ایک بیان میں لون نے موجودہ پولیس ویریفکیشن نظام پر تشویش کا اظہار کیا، جسے انہوں نے’اجتماعی سزا‘ کی ایک شکل کے طور پر بیان کیا جو انفرادی حقوق کو شدید طور پر کمزور کرتا ہے۔
لون نے کہا کہ یہ ہمارا حق ہے کہ پولیس ویریفکیشن نظام کو ازسرنو ترتیب دیا جائے اور ملک کی دیگر ریاستوں میں اپنائے جانے والے طریقوں کے مطابق لایا جائے۔
پیپلز کانفرنس کے سربراہ نے مزید یقین دلایا کہ پولیس ویریفکیشن کا زیادہ منصفانہ نظام قائم کرنے کے مقصد سے درخواست آنے والے ہفتے میں دائر کی جائے گی، جس سے انتہائی ضروری اصلاحات کا آغاز ہوگا۔
اس مہینے کے اوائل میں منعقدہ اسمبلی کے پہلے اجلاس میں کئی ممبران اسمبلی نے پولیس ویریفکیشن کے عمل پر نظر ثانی کا مطالبہ کیا تھا۔ پچھلے کچھ سالوں میں نوکری کے خواہشمندوں کی طرف سے یہ الزام لگایا گیا ہے کہ پولیس اپنے رشتہ دار کے عسکریت پسند یا علیحدگی پسند رہنما ہونے کی وجہ سے منفی سرٹیفکیٹ جاری کرتی ہے۔ (ایجنسیاں)