خلاف ورزی کے مرتکب پرائیوٹ اسکولوں کے خلاف اب کارروائی ہوگی :وزیر تعلیم

سرینگر//
وزیر تعلیم سکینہ ایتو نے منگل کو کہا کہ حکومت کی جانب سے پرائیوٹ اسکولوں کیلئے جو قواعد و ضوابط مرتب کئے گئے ہیں اس پر عملدرآمد ناگزیر ہے ۔
ایتو نے کہاکہ خلاف ورزی کے مرتکب پرائیوٹ اسکولوں کے خلاف سخت کارروائی عمل میں لانے سے بھی گریز نہیں کیا جائے گا۔
ان باتوں کا اظہار وزیر نے اسمبلی کے باہر نامہ نگاروں سے بات چیت کے دوران کیا۔
وزیر تعلیم نے کہاکہ جموں کشمیر میں پرائیوٹ اسکولوں کیلئے رہنما اصول مرتب کئے گئے ہیں اور جو کوئی بھی اس کی خلاف ورزی کرئے گا اس کے خلاف کارروائی ہوگی۔
ان کا مزید کہنا تھا کہ من مانی کرنے کی کسی کو بھی اجازت نہیں دی جائے گی۔وزیر تعلیم نے کہاکہ پرائیوٹ اسکول انتظامیہ از خود فیس میں اضافہ نہیں کرسکتے ہیں۔
ایتو نے یقین دلایا کہ اگر کوئی پرائیوٹ اسکول حکومت کی طرف سے وضح کردہ اصولوں کے خلاف کام کرئے گا اس کو کسی بھی صورت میں بخشا نہیں جائے گا۔
بتادیں کہ والدین نے الزام لگایا ہے کہ پرائیوٹ اسکول انتظامیہ نے ماہانہ فیس میں از خود اضافہ کیا ہے اور اس حوالے سے فیس فکزیشن کمیٹی کو بھی اعتماد نہیں لیا گیا ہے ۔
وزیر تعلیم سے جب اس بارے میں سوال کیا گیا تو انہوں نے واضح کیا کہ فیس میں از خود اضافہ کرنے والوں کو بخشا نہیں جائے گا اور ان کے خلاف قانون کے مطابق کارروائی عمل میں لائی جائے گی۔