لوگوں میںریاستی درجے کی بحالی کی خواہش مضبوط

’لوگوں کو حکومت کے ساتھ بہت امیدیں وابستہ ہیں‘جنہیں پورا کرنے کیلئے میری مکمل حمایت ہے ‘
سرینگر//
جموں کشمیر کے لیفٹیننٹ گورنر‘ منوج سنہا نے کہا کہ حالیہ اسمبلی انتخابات میں ووٹروں کا ہائی ٹرن آؤٹ جمہوری عمل میں لوگوں کے پائیدار اعتماد کی عکاسی کرتا ہے ۔
سنہا نے ساتھ ہی کہا’’تاہم ریاستی درجے کی بحالی کے لئے لوگوں کی خواہشیں مضبوط ہیں‘‘۔
ان کا کہنا تھا کہ مستحق کنبوں کو دوسو یونٹ مفت بجلی فراہم کئے جائیں گے اور اس سلسلے میں طریقہ کار کو حتمی شکل دی جا رہی ہے ۔
لیفٹیننٹ گورنر نے ان باتوں کا اظہار پیر کو اسمبلی کے پہلے سیشن سے اپنے پہلے خطاب کے دوران کیا۔
سنہا نے کہا’’ہم یہاں ایک دہائی کے بعد منعقد ہونے والے کامیاب انتخابات کے بعد جمع ہوئے ہیں‘‘۔ان کا کہنا تھا’’ان انتخابات میں خاص طور پر ان خطوں میں زیادہ ووٹر ٹرن آؤٹ جو روایتی طور پر علیحدگی پسند جذبات کی وجہ سے مکمل طور پر حصہ نہیں لے سکتے تھے بہت حوصلہ افزا تھا تاہم ریاستی درجے کی بحالی ایک مضبوط خواہش ہے ‘‘۔
ایل جی نے کہا’’وزیر اعظم نریندر مودی نے جلد از جموں کشمیر کے ریاستی درجے کی بحالی کے عزم کا اعادہ کیا ہے ‘‘۔انہوں نے کہا’’ میری حکومت ریاستی درجے کی بحالی کے لیے کوششیں کرے گی اور ترقی کیلئے سازگار ماحول پیدا کرے گی‘‘۔
سنہا کا کہنا تھا’’وزراء کی کونسل نے حال ہی میں ایک متفقہ قرارداد منظور کی ہے جس میں ریاستی درجے کی بحالی کا مطالبہ کیا گیا ہے یہ اجتماعی مرضی کی عکاسی کرتا ہے اور اس کے حصول کے لیے تمام اسٹیک ہولڈرز کو ایک ٹیم کے طور پر مل کر کام کرنا ہوگا‘‘۔
ایل جی نے اپنے خطاب میں کہا’’لوگوں کو حکومت کے ساتھ بہت امیدیں وابستہ ہیں اور تمام اسٹیک ہولڈرز کو چاہئے کہ وہ لوگوں کی امیدوں اور خواہشات کو پورا کرنے کیلئے حکومت کی مکمل حمایت کریں‘‘۔
سنہا نے کہا کہ حکومت عوام کو سیاسی طور پر مزید بااختیار بنانے کے لیے اپنے وعدوں کو پورا کرنے کیلئے پوری طرح پرعزم ہے ۔
ان کا کہنا تھا’’میری حکومت مستحق کنبوں کو ۲۰۰؍یونٹ مفت بجلی فراہم کرنے کے لیے پرعزم ہے جس کے لئے طریقہ کار پر کام کیا جا رہا ہے ‘‘۔انہوں نے کہاکہ حکومت ہائیڈل الیکٹرک کے وسائل سے فائدہ اٹھا رہے ہی اور جموں و کشمیر ۲۰۲۶تک بجلی میں خود کفیل ہو جائے گا۔
سنہا نے یہ بھی کہا کہ وزیر اعظم کی سوریہ گھر اسکیم (پی ایم ایس جی ایس) کے تحت تمام سرکاری عمارتوں میں جلد ہی شمسی چھتوں پر بجلی کے کنکشن ہوں گے ۔
ایل جی کا یہ بھی کہنا تھا کہ حکومت کشمیری تارکین وطن پنڈتوں کی وادی میں بحفاظت واپسی کے لیے سنجیدہ کوششیں کرے گی اور کشمیری مہاجر ملازمین کو محفوظ رہائش فراہم کرے گی۔