مبارک گل نے راج بھون میں عبوری اسپیکر کا حلف لیا

سرینگر//
نیشنل کانفرنس لیڈر اور عید گاہ سے رکن اسمبلی مبارک گل نے ہفتے کو یہاں راج بھون میں جموں وکشمیر اسمبلی کے عبوری اسپیکر کے طور پر حلف لیا۔
جموں وکشمیر کے لیفٹیننٹ گورنر منوج سنہا نے انہیں حلف دلایا۔اس موقع پر وزیر اعلیٰ عمر عبداللہ اور نیشنل کانفرنس کے دیگر بڑے لیڈر موجود تھے ۔
بتادیں کہ لیفٹیننٹ گورنر منوج سنہا نے جمعے کے روز مبارک گل کو عبور ی سپیکر مقرر کیا تھا۔
منوج سنہا کی طرف سے جاری کردہ ایک مواصلت میں کہا گیا تھا کہ جموں وکشمیر تنظیم نو ایکٹ۲۰۱۹کے سیکشن ۲۴کے تحت مبارک گل کو عبوری سپیکر مقرر کیا گیا ہے ۔
حکم نامے میں مزید کہا گیا ہے کہ۲۱؍اکتوبر کو دوپہر دو بجے قانون ساز اسمبلی سری نگر میں نو منتخب اراکین حلف لیں گے ۔
دریں اثنا گل نے ہفتے کو جموں و کشمیر اسمبلی کے عبوری اسپیکر منتخب ہونے پر خوشی کا اظہار کرتے ہوئے کہا کہ نیشنل کانفرنس اپنے منشور کو عملی جامہ پہنانے کیلئے پر عزم ہے ۔انہوں نے کہا’’نیشنل کانفرنس اپنے اہداف سے منحرف نہیں ہوگی اور نہ ہم کمزور ہوں گے ـ‘‘۔
این سی لیڈر نے ان باتوں کا اظہار ہفتے کو عبوری اسپیکر کا حلف لینے کے بعد یہاں نامہ نگاروں کے ساتھ بات کرنے کے دوران کیا۔
جموں وکشمیر اسمبلی کا عبوری اسپیکر منتخب ہونے پر انہوں نے کہا’’اللہ تعالیٰ کا شکر ہے کہ مجھے یہ موقع نصیب ہوا یہ موقع ہر کسی کو نصیب نہیں ہوتا ہے ‘‘۔انہوں نے کہا’’جس طرح ایک کھلاڑی کو اعزاز سے نواز جاتا ہے اسی طرح مجھے بھی ایک بڑے اعزاز سے سرفراز کیا گیا‘‘۔
گل کا کہنا تھا’’عمر عبداللہ نے ایک وعدہ کیا ہے اور نیشنل کانفرنس اپنے اہداف سے منحرف نہیں ہوگی اور نہ ہم کمزور ہوں گے ۔‘‘