بہت جلد لیجسلیچر پارٹی کی میٹنگ طلب کی جائیگی: رینا

جموں//
بی جے پی کے سینئر لیڈر رویندر رینا نے پیر کو کہاکہ آنے والے دنوں کے دوران بھاجپا لیجسلیچر پارٹی کی میٹنگ منعقد ہوگی جس میں اپوزیشن لیڈر کو چنا جائے گا۔
رینا نے کہاکہ اسمبلی انتخابات میں بی جے پی نے اچھی کارکردگی کا مظاہرہ کیا ہے ۔
ان باتوں ک اظہار رینا نے جموں میں نامہ نگاروں سے بات چیت کے دوران کیا۔
بی جے پی لیڈر نے کہاکہ آنے والے دنوں کے دوران بھاجپا لیجسلیچر پارٹی کی میٹنگ طلب کی جائے گی جس دوران آگے کا لائحہ عمل طے کیا جائے گا۔ان کے مطابق اس میٹنگ میں مرکزی وزیرپرلاد جوشی اور ترون چگ بھی شریک ہونگے ۔
اپوزیشن لیڈر کے انتخاب کے بارے میں پوچھے گئے سوال کے جواب میں رویندر رینا نے کہاکہ اس پر کام شروع ہو چکا ہے ۔
رینا نے مزید بتایاکہ جموںکشمیر میں اسمبلی انتخابات پر امن ماحول میں اختتام پذیر ہوئے اور اب نئی حکومت بھی معروض وجود میں آئے گی۔
ان کے مطابق جموں صوبے بھاجپا سب سے بڑی پارٹی کے طورپر ابھر کر سامنے آئی ہے ۔
اس دوران جموں میں بی جے پی کے صدر دفتر میں پیر کو پارٹی کے تمام نو منتخب ۲۹ارکان اسمبلی کو مبارکباد دینے کیلئے ایک خصوصی تقریب منعقد کی گئی۔
تقریب میں پارٹی کے سینئر لیڈر رویندر رینا اور دیگر لیڈرں نے نو منتخب ارکان اسمبلی کا خیر مقدم کیا اور انہیں پھول مالائیں پہنائیں۔
اس موقع پر رویندر رینا نے میڈیا کو بتایا’’ہم پارٹی کے نو منتخب ارکان اسمبلی کا دفتر میں خیر مقدم کرتے ہیں‘‘۔انہوں نے کہا کہ بی جے پی نے جموں وکشمیر اسمبلی انتخابات میں۲۹ سیٹوں پر شاندار جیت درج کی اور کل۲۶فیصد ووٹ حاصل کئے ۔
رینا نے جموں کشمیر کے لوگوں خاص کر جموں کے لوگوں کو مبارک باد پیش کی۔
جموںکشمیر میں صدر راج ختم ہونے کے بارے میں پوچھے جانے والے ایک سوال کے جواب میں انہو ں نے کہا’’صدر جمہوریہ درو پدی مرمو نے جموں و کشمیر میں صدر راج ختم کیا ہے اور اب یہاں نئی چنی ہوئی سرکار شروع ہوگی۔‘‘