بھاری اکثریت سے بی جے پی کی سرکار بن رہی ہے:رینا

جموں//
بی جے پی کے جموںکشمیر یونٹ کے صدر‘ رویندر رینہ کا کہنا ہے کہ جموںکشمیر میں پہلی بار بھاری اکثریت سے بی جے پی کی سرکار بننے والی ہے ۔
رینا نے ساتھ ہی کہا کہ جموں وکشمیر کا اگلا وزیر اعلیٰ بھی بی جے پی کا ہی ہوگا۔
بی جے پی یونٹ صدر نے ان باتوں کا اظہار منگل کے روز یہاں اسمبلی انتخابات کے آخری مرحلے کی پولنگ کے موقع پر نامہ نگاروں کے ساتھ بات کرنے کے دوران کیا۔
رینا نے کہا’’جموں وکشمیر میں لوگ لمبی لمبی قطاروں میں ووٹ ڈال رہے ہیں جو جمہوریت کی جیت ہے ‘‘۔
ان کا کہنا تھا’’یہاں بہت ہی اچھے طریقے سے جمہوریت کا یہ تہوار چل رہا ہے جس کیلئے میں الیکشن کمیشن، اس کے تمام عملے ،پولیس،پیرا ملٹری فورسز، ووٹروں اور دیگر متعلقین کا شکریہ ادا کرتا ہوں‘‘۔
رینا نے کہا کہ بی جے پی کو جموں کے ساتھ ساتھ کشمیر میں بھی زبردست سپورٹ مل رہا ہے ۔انہوں نے کہا’’مجھے امید ہے کہ بی جے پی کی بھاری اکثریت کے ساتھ یہاں سرکار بنے گی اور یہاں کا اگلا وزیر اعلیٰ بی جے پی کا ہی ہوگا۔‘‘