اودھم پور میں۱۶سو سے زیادہ غیر قانونی شراب بوتلیں بر آمد

جموں//
سماجی جرائم کے خلاف کارروائیوں کو جاری رکھتے ہوئے پولیس نے جموں و کشمیر کے ضلع اودھم پور میں ایک شراب فروش کو گرفتار کرکے۱۶سو سے زیادہ غیر قانونی شراب کی بوتلیں ضبط کی ہیں۔
ایک پولیس ترجمان نے اپنے ایک بیان میں کہا کہ پولیس اسٹیشن رام نگر کی ایک پارٹی نے ایف ایس ٹی کی ایک ٹیم کے ساتھ اتوار کو گھاس منڈی میں ناکے کے دوران ایک آٹو کو تلاشی کی غرض سے روکا۔
ترجمان نے کہا کہ تلاشی کے دوران آٹو سے۳۳بکس بر آمد کئے گئے جن میں۱۸۰ملی لیٹر کی۱۶۳۰غیر قانونی شراب کی بوتلیں تھیں۔
بیان میں کہا گیا کہ آٹو ڈرائیور کو موقع پر ہی گرفتار کیا گیا جس کی شناخت گورکھو رام ساکن رام نگر کے طور پر کی گئی ہے ۔
پولیس ترجمان نے کہا کہ اس سلسلے میں پولیس اسٹیشن رام نگر میں متعلقہ دفعات کے تحت ایک کیس درج کرکے مزید تحقیقات شروع کی گئی۔
قابل ذکر ہے کہ ضلع اودھم پور میں اسمبلی انتخابات کے دوران پولیس نے۳۷معاملے درج کرکے ۶۴۰لیٹر غیر قانونی شراب بر آمد کی ہے ۔