سیمنٹ کدل میں موٹر سائیکل سوار سڑک حادثے میں ہلاک

سرینگر//
سرینگر کے علاقے سیمنٹ کدل میں ہفتہ کے روز ایک سڑک حادثے میں ایک ۱۸سالہ لڑکا ہلاک ہو گیا۔
ایک عہدیدار نے ایک مقامی خبر رساں ایجنسی کو بتایا کہ رام پورہ چھتہ بل کے رہائشی ۱۸سالہ موٹر سائیکل سوار طالب بشیر ولد بشیر احمد گڈا سرینگر کے سیمنٹ کدل میں لوڈ کیریئر سے ٹکرانے کے بعد حادثے کا شکار ہوگیا۔
طالب کوعلاج کے لئے ایس ایم ایچ ایس ہسپتال ریفر کیا گیا تھا ، لیکن ڈاکٹروں نے انہیں مردہ قرار دے دیا۔
عہدیدار نے مزید بتایا کہ پولیس نے واقعہ کا نوٹس لے لیا ہے اور مزید تحقیقات شروع کردی گئی ہے۔
اس دوران جموں کے کٹھوعہ ضلع میں فوج کی ایک گاڑی سڑک سے پھسل کر گہری کھائی میں جا گری جس کے نتیجے میں ایک جوان ہلاک اور چھ دیگر زخمی ہوگئے۔
ایک عہدیدار نے بتایا کہ یہ حادثہ جمعہ کے روز ماچیڈی بلاور روڈ پر سکرالا دیوی مندر کے قریب اس وقت پیش آیا جب فوجی دور دراز علاقے میں گشت پر تھے۔
عہدیداروں نے بتایا کہ مقامی افراد سمیت امدادی کارکن موقع پر پہنچے اور سات زخمی فوجیوں کو اسپتال پہنچایا جہاں ان میں سے ایک سپاہی رام کشور کو مردہ قرار دے دیا گیا۔
فوج کی رائزنگ اسٹار کور نے پھولوں کی چادر چڑھائی اور سپاہی کو خراج عقیدت پیش کیا۔
رائزنگ اسٹار کور کو آپریشنل ڈیوٹی کے دوران بہادر سپاہی سیپ رام کشور کی بدقسمت اور بے وقت موت پر گہرا افسوس ہے۔ دکھ کی اس گھڑی میں ہندوستانی فوج سوگوار خاندان کے ساتھ کھڑی ہے اور ان کی مدد کے لئے پرعزم ہے۔