سنہا کی پہلے مرحلے میں ریکارڈ ٹرن آؤٹ پر رائے دہندگان کو مبارکباد

سرینگر//
لیفٹیننٹ گورنر ‘منوج سنہا نے اسمبلی انتخابات کے پہلے مرحلے کے رائے دہندگان کو ریکارڈ رائے دہندگی پر دلی مبارکباد پیش کی ہے۔
ایک سوشل میڈیا پوسٹ میں لیفٹیننٹ گورنر نے کہا کہ ان کی پرجوش شرکت ہندوستانی جمہوریت کی مضبوطی اور جمہوری اقدار میں لوگوں کے اعتماد کا ثبوت ہے۔
سنہانے ایکس پر پوسٹ کیا’’تاریخی رائے دہندگی کیلئے جموں و کشمیر کو مبارکباد! میں ان تمام رائے دہندگان کا شکریہ ادا کرنا چاہتا ہوں جنہوں نے پہلے مرحلے میں اپنے حق رائے دہی کا استعمال کیا۔ پرامن، آزاد اور منصفانہ انتخابات میں ریکارڈ رائے دہی ہندوستانی جمہوریت کی مضبوطی اور جمہوری اقدار میں لوگوں کے اعتماد کی تصدیق کرتی ہے‘‘۔
ایل جی نے مزید کہا’’میں اپنی تمام بہنوں اور پہلی بار ووٹ ڈالنے والوں کو مبارکباد دیتا ہوں کہ انہوں نے جمہوریت کا تہوار منانے کے لئے بڑی تعداد میں شرکت کی۔ شاندار سیکورٹی فورسز، جے کے پی اور الیکشن افسروں کا تہہ دل سے شکریہ۔ پہلے مرحلے میں تقریباً۵۹ فیصد رائے دہی سے پتہ چلتا ہے کہ جموں و کشمیر میں جمہوریت پھل پھول رہی ہے۔ ڈوڈہ، کشتواڑ، رام بن، پلوامہ، شوپیاں، کولگام اور اننت ناگ میں رائے دہندگان کی لمبی قطاروں نے مخالفین کے پروپیگنڈے کو ناکام بنا دیا۔ عوام نے تقسیم کرنے والے عناصر کے ایجنڈے کو بھی مسترد کردیا ہے اور جمہوریت پر اپنے اعتماد کا اعادہ کیا ہے۔‘‘