نئی دہلی/۱۰ستمبر
دہلی کی ایک عدالت نے ٹیرر فنڈنگ معاملے میں لوک سبھا رکن پارلیمنٹ انجینئر رشید کو 2 اکتوبر تک عبوری ضمانت دے دی ہے۔
انجینئر رشید کے نام سے مشہور شیخ عبدالرشید نے بارہمولہ میں 2024 کے لوک سبھا انتخابات میں سابق وزیر اعلی عمر عبداللہ کو شکست دی تھی۔
ایڈیشنل سیشن جج چندر جیت سنگھ نے رشید کو راحت دی، جنہوں نے جموں و کشمیر اسمبلی انتخابات میں انتخابی مہم چلانے کے لئے عبوری ضمانت کے لئے عدالت سے رجوع کیا تھا۔ پانچ جولائی کو عدالت نے رشید کو لوک سبھا کے رکن کی حیثیت سے حلف لینے کے لئے پیرول کی تحویل میں دے دیا تھا۔
رشید 2017 کے ٹیرر فنڈنگ معاملے میں غیر قانونی سرگرمی (روک تھام) ایکٹ کے تحت قومی تحقیقاتی ایجنسی (این آئی اے) کے ذریعہ گرفتار کیے جانے کے بعد سے 2019 سے جیل میں ہیں۔ وہ تہاڑ جیل میں بند ہے۔
عدالت نے ان کی باقاعدہ ضمانت کی درخواست پر اپنا فیصلہ کل کے لئے محفوظ کر لیا ہے۔ رشید کا نام کشمیری تاجر ظہور وٹالی کی تفتیش کے دوران سامنے آیا تھا، جسے این آئی اے نے وادی کشمیر میں دہشت گرد گروہوں اور علیحدگی پسندوں کی مبینہ طور پر مالی اعانت کرنے کے الزام میں گرفتار کیا تھا۔
این آئی اے نے اس معاملے میں کشمیری علیحدگی پسند رہنما یاسین ملک، لشکر طیبہ کے بانی حافظ سعید اور حزب المجاہدین کے سربراہ سید صلاح الدین سمیت کئی لوگوں کے خلاف چارج شیٹ دائر کی تھی۔ ملک کو 2022 میں ٹرائل کورٹ نے عمر قید کی سزا سنائی تھی جب انہوں نے الزامات کا اعتراف کیا تھا۔
