شان مسعود نے بطور کپتان پاکستان کرکٹ کی تاریخ کا سب سے شرمناک ریکارڈ اپنے نام کرلیا

لاہور//
شان مسعود پاکستان کرکٹ کی تاریخ میں پہلے 4 میں 4 ٹیسٹ میچ ہارنے والے پاکستان کے پہلے کپتان بن گئے ہیں۔ بنگلادیش نے راولپنڈی ٹیسٹ میچ پاکستان کو 10 وکٹوں سے شکست دیکر تاریخ رقم کی۔ راولپنڈی ٹیسٹ میچ کے آخری روز پاکستان نے ایک وکٹ کے نقصان پر اننگز کا آغاز کیا تو کپتان شان مسعود محض 5 رنز کا اضافہ کرنے کے بعد وکٹ گنوا بیٹھے جبکہ بابراعظم 22، عبداللہ شفیق 37، شاہین شاہ آفریدی 2، نسیم شاہ 3، سعود شکیل، سلمان علی آغا اور محمد علی صفر پر پویلین لوٹ گئے۔
محمد رضوان نے 51 رنز کی مزاحمتی اننگز کھیلی، ان کی اننگز میں 6 چوکے شامل تھے۔ پاکستان کو بنگلادیش کی کیخلاف محض 29 رنز کی برتری حاصل تھی۔ بنگلادیش کی جانب سے دوسری اننگز میں مہدی حسن میراز 4، شکیب الحسن 3 جبکہ شورف الاسلام، ناہید حسن اور حسن محمود نے ایک ایک وکٹ حاصل کی۔
بنگال ٹائیگرز کو پنڈی ٹیسٹ میچ جیتنے کیلئے محض 30 رنز کا ہدف ملا جو اوپنر ذاکر حسن، شادمان اسلام نے بغیر وکٹ گنوا حاصل کرلیا۔
اس کامیابی کے ساتھ ہی بنگلہ دیش پاکستان کو اس کے ہوم گرائونڈ پر 10 وکٹوں سے ہرانے والی پہلی ٹیم بن گئی۔ اس ٹیسٹ میں شکست کے ساتھ ہی شان مسعود پاکستان کرکٹ کی تاریخ میں پہلے 4 میں 4 ٹیسٹ میچ ہارنے والے پاکستان کے پہلے کپتان بن گئے ہیں ۔ ان کی زیر قیادت رواں سال کے شروع میں قومی ٹیم کو آسٹریلیا کیخلاف آسٹریلیا میں 0-3 کی شکست کا سامنا کرنا پڑا تھا ۔
واضح رہے کہ پنڈی ٹیسٹ کے چوتھے روز بنگلا دیش نے اپنی پہلی نامکمل اننگز کا آغاز 316 رنز 5 کھلاڑی آؤٹ سے کیا تھا اور پاکستان کے 448 رنز کے جواب میں بنگلادیش کی ٹیم پہلی اننگز میں 565 رنز بنا کر آؤٹ ہوئی تھی یوں مہمان ٹیم نے پہلی اننگز میں 117رنز کی برتری حاصل کی جب کہ قومی ٹیم نے ٹیسٹ میچ کے چوتھے روز کے اختتام تک اپنی دوسری اننگز میں ایک وکٹ پر 23 رنز بنائے تھے۔