فل ڈریس ریہرسل۔۔۔سخت سکیورٹی حصار میں سرینگر اور جموں میں تقاریب کا اہتمام

سرینگر//
جموںکشمیر کے دونوں دارالحکومتوں سرینگر اور جموں میں منگل کے روز سخت ترین حفاظتی حصار اور ڈرون کیمروں کی نگرانی میں یوم آزادی کی تقریبات کے سلسلے میں فل ڈریس ریہرسل کی گئی۔
اس کے علاوہ ضلعی ہیڈکوارٹروں میں بھی سخت سیکورٹی انتظامات کے بیچ فل ڈریس ریہرسل تقریبات کا انعقاد عمل میں آیا۔
سرینگر کے ہائی سیکورٹی زون بخشی اسٹیڈیم اور مولانا آزاد اسٹیڈیم جموں میں فل ڈریس ریہرسل کے موقع پر بالترتیب ڈویژنل کمشنر کشمیر اور ڈویڑنل کمشنر جموں نے پرچم کشائی کی رسم انجام دی اور پریڈ کی سلامی لی۔
سرینگر میں منعقدہ ریہرسل تقریب میں مختلف تعلیمی اداروں کے طلبا وطالبات کے ساتھ ساتھ مرکزی نیم فوجی دستوں، جموں وکشمیر پولیس، ہوم گارڈ اور فائر اینڈ ایمرجنسی سروس نے پریڈ میں حصہ لیا۔
فل ڈریس ریہرسل کی اس تقریب، جس کی مانیٹرنگ ڈرون کیمروں کے ذریعے کی گئی، میں فنکاروں اور طالب علموں نے رنگا رنگ ثقافتی پروگرام بھی پیش کئے ۔
فل ڈریس ریہرسل کی تقریب میں صوبائی کمشنر کشمیر نے پرچم کشائی کی رسم انجام دی اور پریڈ کی سلامی لی۔ اس موقع پر کشمیر زون پولیس کے انسپکٹر جنرل وی کے بردی اور دیگر سینئر سول و پولیس عہدیدار موجود تھے ۔
یو این آئی کے نامہ نگار کے مطابق فل ڈریس ریہرسل کے دوران بخشی اسٹیڈیم کی طرف جانے والے روڑ کو کئی مقامات پر سیل کیا گیا تھا۔ نیز اسٹیڈیم کے اندر اور باہر سینکڑوں کی تعداد میں سیکورٹی فورسز اور ریاستی پولیس کے اہلکار تعینات کئے گئے تھے ۔
نامہ نگار کے مطابق سرینگر میں یوم آزادی کے سلسلے میں منعقد ہونے والی فل ڈریس ریہرسل تقریب کی ڈرون کیمروں کے ذریعے مانیٹرنگ کی گئی۔
سیکورٹی ذرائع نے بتایا کہ یوم آزادی کی ریہرسل تقریبات کے دوران اضلاع میں واقع اسٹیڈیموں کے اندر و باہر بھی سیکورٹی فورسز اور ریاستی پولیس کے اضافی اہلکاروں کو تعینات کر رکھا گیا تھا۔انہوں نے مزید کہا کہ فل ڈریس ریہرسل تقریبات، جن میں طلبا، فنکاروں اور سیکورٹی فورسز نے بڑھ چڑھ کر حصہ لیا، پرامن طور پر اختتام کو پہنچیں۔
اس موقع پر صوبائی کمشنر کشمیر ‘وی کے بدھوری نے کہا کہ فل ڈرس ریہرسل میں بچوں اور دوسرے شرکا نے کافی جوش و جذبے کا مظاہرہ کیا۔انہوں نے کہا کہ امسال بھی۱۵؍اگست کی تقریب میں مقامی لوگوں کی کثیر تعداد متوقع ہے ۔
ادھر جموں میںیوم آزادی کی تقریبات کے لئے فل ڈریس ریہرسل آج یہاں ایم اے سٹیڈیم میں پورے حب الوطنی کے جذبے اور جوش و خروش کے ساتھ منعقد کی گئی۔
صوبائی کمشنر جموں رمیش کمار نے پریڈ کی فل ڈریس ریہرسل کا معائنہ کیا اور مارچ پاسٹ کی سلامی لی۔
کمار نے اَپنے خطاب میں یوم آزادی کی مبارک باد پیش کی اور سب پر زور دیا کہ وہ ہماری عظیم قوم کے اتحاداورکثرت میں وحدت کی حفاظت کا عہد کریں۔
یوم آزادی پریڈ میں ایس ایس بی، سی آر پی ایف، آئی آر پی وومن بٹالین، آئی آر پی مین بٹالین، جے کے اے پی، ڈِی پی ایل جموں، فائر اینڈ ایمرجنسی سروسز، فارسٹ پروٹیکشن فورس، سینک سکول، این سی سی بوائز، گرلز، جی جی ایچ ایس ایس مبارک منڈی، جی ایچ ایس ایس گاندھی نگر، ایس آر ایم ایل ماڈل ایچ ایس، جی جی ایچ ایس ایس ریہری، جی ایچ ایس ایس پالورا، جے کے پی پبلک سکول میران صاحب گرلز، بوائز جی ایچ ایس جانی پور، جی ایچ ایس ایس سروال، جی ایچ ایس ایس ستواری اور جی ایچ ایس ڈگیناکے دستے شامل تھے۔
مارچ پاسٹ کا بی ایس ایف ، جے کے اے پی ، آرمی پبلک سکول جموں کینٹ ، جموں کے پولیس پبلک سکول میران صاحب سمیت سکولی طلبأکے پائپ اور براس بینڈ بھی حصہ تھے۔
جموں و کشمیر اکیڈیمی آف آرٹ کلچر اینڈلنگویجز کے سکولی بچوں اور فنکاروں نے قومی اتحاد، یکجہتی اور حب الوطنی کے موضوعات پر مبنی ایک رنگا رنگ ثقافتی پروگرام پیش کیا۔ کلچرل پروگراموںمیں جموں و کشمیر یو ٹی کی ہم آہنگی اور مشترکہ ثقافت ، لوک موسیقی اور رقص کی عکاسی کی گئی۔
اِ س موقعہ پرایڈیشنل ڈائریکٹر جنرل آف پولیس آنند جین ،ڈی آئی جی جموں سانبہ کٹھوعہ۔ کمشنر جے ایم سی، ضلع ترقیاتی کمشنر جموں کے علاوہ مختلف محکموں کے سربراہان اور سینئر سول اور پولیس افسران بھی موجود تھے۔
اطلاعات کے مطابق یونین ٹریٹری آف لداخ کے دونوں اضلاع میں بھی فل ڈریس ریہرسل کی تقریبات منعقد ہوئیں جن میں طلبا، فنکاروں، سیکورٹی اہلکاروں کے علاوہ عام لوگوں اور سول و پولیس انتظامیہ کے عہدیداروں نے شرکت کی۔
دوسری جانب جموں کشمیر حکومت نے تین دہائیوں سے جاری روایت کو برقرار و بحال رکھتے ہوئے امسال بھی یوم آزادی کی تقریبات میں سرکاری ملازمین کی شرکت کو لازمی و ضروری قرار دیا ہے ۔
حکومت نے اس سلسلے میں باقاعدہ حکم نامے جاری کئے ہیں جن میں حکم کی عدولی کرنے والے ملازمین کے خلاف تادیبی کارروائی عمل میں لانے کا انتباہ کیا گیا ہے ۔