یقینا خبر یہ نہیں ہے اور بالکل بھی نہیں ہے کہ اپنے قائد ثانی ‘اعلیٰ حضرت جناب ڈاکٹر فاروق عبداللہ صاحب نے الیکشن … اسمبلی الیکشن لڑنے کا اعلان کیا ہے… اس عمر میں لڑنے کا اعلان کیا ۔یقینا یہ خبر نہیں ہے اور… اور اس لئے نہیں ہے کیونکہ ان کے صاحبزادے‘گورے گورے بانکے چھورے عمر عبداللہ نے الیکشن لڑنے سے منع کیا ہے… ایسے میں قائد ثانی وزارت اعلیٰ کی کرسی کسی اور کیلئے کھلا کیسے چھوڑ سکتے تھے… اس لئے انہوں نے اعلان کیا کہ وہ ابھی مر نہیں گئے ہیں‘ جہاں ضرورت ہو گی وہ الیکشن لڑیںگے ۔ دُعا ہے اللہ میاں انہیں عمر دراز عطا کرے۔ خبر یہ ہے کہ قائد ثانی کاکہنا ہے کہ ان کی نیشنل کانفرنس اسمبلی الیکشن کسی دوسری جماعت کے ساتھ اتحاد نہیں کریگی اور… اور سبھی ۹۰ کے ۹۰ حلقوں پر اپنے امیدوار کھڑا کرے گی… آپ سوچ رہے ہوں گے کہ اس میں خبر کیا ہے… صاحب! اس میں خبر یہ ہے کہ … کہ جہاں قائد ثانی پی ڈی پی کے ساتھ کسی بھی انتخابی مفاہمت کو خارج از امکان قرار دے رہے ہیں وہیں یہ جناب کانگریس پارٹی کے ساتھ بھی اتحاد سے انکار کررہے ہیں… اس کے باوجود کررہے ہیں کہ ملکی سطح پر این سی انڈیا بلاک کا حصہ ہے جس میں کانگریس اور پی ڈی پی دونوں ہیں… پی ڈی پی سے اتحاد نہ کرنا تو صاحب ہماری سمجھ میں آگیا تھا اور… اور لوک سبھا الیکشن کے دوران ہی سمجھ میں آگیا تھا… لیکن کانگریس سے بھی کسی قسم کے گٹھ جوڑ سے انکار… اللہ میاں کی قسم قائد ثانی کی یہ بات ہماری سمجھ میں نہیں آرہی ہے … کیا یہ کہہ کر ڈاکٹر صاحب کسی تیسری قوت … سیاسی قوت کو کوئی اشارہ دینا چاہتے ہیں ؟ یہ اشارہ کہ آج سے دس سال پہلے آپ نے کشمیر کی ایک جماعت کو آزمایا تھا آج دس سال بعد ہمیں بھی موقع دیجئے… یقین کیجئے کہ ایسا ہو سکتا ہے اور… اور اس لئے ہو سکتا ہے یہ جو سیاست ہے اس میں مستقل کچھ بھی نہیں… دوست اور نہ دشمن۔اور ڈاورکٹر صاحب بھی شاید اسی بات کا اشارہ دینا چاہتے ہیں کہ…کہ ابھی ان کی عمر اتنی بھی نہیں ہو گئی ہے کہ… کہ آپ ان پر بہکی بہکی باتیں کرنے کا الزام لگا ئیں …نہیں صاحب ایسا نہیں ہے۔ قائد ثانی نے جو کہا سوچ سمجھ کر کہا … یہ کہا کہ ان کی جماعت کسی سے گٹھ جوڑ نہیں کرے گی … بالکل بھی نہیں کرے گی اور… اور اللہ میاں کی قسم یہی اصل خبر بھی ہے ۔ بریکنگ نیوز ہے …قائد ثانی کی بریکنگ نیوز۔ ہے نا؟
