جموں میں موسم کی قہر سامانیاں‘بستیاں زیر آب

جموں//
جموں صوبے میں تیز بارشوں کی وجہ سے سیلابی صورتحال پیدا ہوئی ہے ۔ کئی علاقوں میں پانی رہائشی مکانوں میں گھس آیا جس وجہ سے مکینوں کو مشکلات کا سامنا کرناپڑرہا ہے ۔
راجوری کے خواس علاقے میں کچا مکان گرنے سے ۶۰سالہ خاتون جاں بحق ہوئی جبکہ بارشوں کی وجہ سے متعدد ڈھانچوں کو بھی نقصان پہنچا ۔
اطلاعات کے مطابق محکمہ موسمیات کی پیشین گوئی کے عین مطابق جموں صوبے میں تیز بارشوں کا سلسلہ جاری ہے جس وجہ سے کئی علاقوں میں سیلابی صورتحال پیدا ہوئی ہے ۔
جموں کے تالاب تلو علاقے میں کئی کالونیاں زیر آب آگئی ہیں جس وجہ سے مکینوں کو عبور و مرور میں دقتیں پیش آرہی ہیں۔
راجوری کے خواس علاقے میں تیز بارشوں کی وجہ سے رہائشی مکان زمین بوس ہونے سے۶۰سالہ خاتون ملبے کے نیچے زندہ دفن ہوئی۔ گر چہ مقامی لوگوں نے فوری طورپر ریسکیو آپریشن شروع کیا اور خاتون کو باہر نکال کر ہسپتال پہنچایا تاہم وہاں پر وہ جانبر نہ ہو سکی۔ متوفیہ کی شناخت کاکو دیوی کے بطور کی گئی ہے ۔
نامہ نگار نے بتایا کہ کٹھوعہ ضلع کے ڈونگا علاقے میں بادل پھٹنے کی وجہ سے ایک درجن کے قریب رہائشی مکانوں کو نقصان پہنچا تاہم اس دوران کسی کے ہلاک ہونے کے بارے میں کوئی اطلاع موصول نہیں ہوئی۔
جموں شہر کے نشیبی علاقوں میں سیلابی صورتحال پیدا ہوئی ہے اور متعدد کالونیوں میں پانی گھس آیا ہے ۔
مقامی لوگوں کا کہنا ہے کہ ڈرینج سسٹم ناکارہ ہونے کی وجہ سے پانی رہائشی مکانوں میں گھس آیا جس وجہ سے املاک کو نقصان پہنچا ہے ۔
نامہ نگار کے مطابق جموں کے ڈوگرا چوک، کنال روڈ، بکرم چوک ، گاندھی نگر، شاستری نگر، گورکھا کالونی اور سنجے نگر میں تیز بارشوں کی وجہ سے پانی رہائشی مکانوں کے ساتھ ساتھ دکانوں میں بھی گھس آیا۔
تاجروں کا کہنا ہے کہ ایک طرف سمارٹ سٹی پر کروڑوں روپے خرچ کئے جارہے ہیں تو دوسری جانب معمولی بارشوں کی وجہ سے جموں شہر میں سیلابی صورتحال پیدا ہوئی۔انہوں نے کہاکہ دکانوں میں پانی گھسنے کی وجہ سے قیمتی اشیائکو نقصان پہنچا ہے ۔
نامہ نگار کے مطابق جموں صوبے کے ندی نالوں میں پانی کی سطح کافی بڑھ گئی ہے ، حکام نے لوگوں سے اپیل کی ہے کہ وہ دریاوں اور ندی نالوں کے کناروں کے نزدیک جانے سے گریز کریں۔
حکام کے مطابق گر چہ ندی نالوں میں پانی کی سطح میں اضافہ ہوا ہے تاہم جموں صوبے میں سیلابی صورتحال کا کوئی امکان نہیں۔انہوں نے مزید بتایا کہ جموں کے راجوری میں گزشتہ چوبیس گھنٹوں کے دوران۷۴؍ایم ایم بارشیں ریکارڈ کی گئی، جموں میں۵ء۴۸؍اور رام بن میں۵ء۱۷؍ایم ایم ریکارڈ ہوا۔
دریں اثنا محکمہ موسمیات کے ایک ترجمان نے بتایاکہ جموں صوبے میں۱۵؍اگست سے موسلا دار بارشوں کاامکان ہے جس کے نتیجے میں پہاڑی علاقوں میں بادل پھٹنے کے واقعات رونما ہو سکتے ہیں۔