۱۴۴۶ھ:عمرہ زائرین کے استقبال کی تیاریاں مکمل:سعودیہ

سرینگر//
ڈائریکٹریٹ جنرل پاسپورٹ اینڈ امیگریشن ’جوازات‘ کا کہنا ہے کہ نئے عمرہ سیزن کیلیے تمام تیاریاں مکمل کرلی گئی ہیں۔ عمرہ زائرین کے استقبال کے لیے ہوائی اڈوں پر اضافی امیگریشن کاونٹرز قائم کردیئے گئے ہیں۔
اخبار ۲۴نے محکمہ جوازات کی جانب سے جاری بیان کے حوالے سے مزید کہا ہے کہ وزارت حج وعمرہ کی جانب سے سال۱۴۴۶ ھ کے عمرہ سیزن کے آغاز کا اعلان کیے جانے کے بعد جدہ اور مدینہ منورہ کے ہوائی اڈوں اوربری سرحدی چوکیوں پر عمرہ زائرین کے استقبال کے لییتمام تیاریاں مکمل کرلی گئی ہیں۔
ہوائی اڈوں پرایسے اہلکاروں کو تعینات کیا گیا ہے جو مختلف زبانوں کی کافی معلومات رکھتے ہیں۔ ایسے اہلکاروں سے زائرین کو کافی سہولت ہوتی ہے۔
محکمہ پاسپورٹ اینڈ امیگریشن ’جوازات‘ کا مزید کہنا تھا کہ مملکت آنے والے عمرہ زائرین امیگریشن قوانین کا خاص خیال رکھیں۔ ویزے کی مدت مکمل ہونے سے قبل اپنے مقررہ وقت پر واپسی کے سفر کو یقینی بنائیں تاکہ کسی قسم کی خلاف ورزی کے مرتکب نہ ہوں۔
واضح رہے امسال سعودی وزارت حج وعمرہ کی جانب سے عمرہ سیزن کے آغاز کا اعلان ۱۴ ذوالحجہ ۱۴۴۵ کو ہی کردیا گیا تھا۔
وزارت حج کے اعلان کے ساتھ ہی تمام سرکاری اداروں نے عمرہ زائرین کے استقبال کے لیے تیاریاں شروع کردیں اس حوالے سے محکمہ امیگریشن اینڈ پاسپورٹ نے تمام ہوائی اڈوں اور بری و سمندری چوکیوں پر اضافی عملہ تعینات کردیا جبکہ کاونٹرز کی تعداد بھی بڑھا دی گئی۔