لہیہ میںفوجی ٹینک دریا کے بہاؤ میں بہہ گئی ‘۵ فوجی اہلکار ہلاک

سرینگر//
لداخ یونین ٹریٹری کے ضلع لیہہ میں جمعہ کی شب حقیقی کنٹرول لائن (ایل اے سی) کے قریب دریائے شیوک میں ایک ٹینک کو حادثہ پیش آنے کے نتیجے میں۵فوجی جوان جاں بحق ہوگئے ۔
فوج کی فائر اینڈ فیوری کور نے’ایکس‘پر ایک پوسٹ کے ذریعے جانکاری فراہم کرتے ہوئے کہا کہ ۲۸ جون کی شب فوجی تربیتی سرگرمی سے فارغ ہونے کے بعد مشرقی لداخ کے ساسر برنگسا کے قریب دریائے شیوک میں پانی کی سطح میں اچانک اضافہ ہوا جس میں فوج کا ایک ٹینک پھنس گیا۔
فوج نے کہا کہ حادثہ پیش آتے ہی بچائو ٹیمیں جائے وقوعہ پر پہنچ گئیں تاہم پانی کے بہائو میں تیزی اور سطح میں اضافے کی وجہ سے بچائو آپریشن کامیاب نہ ہوسکا جس کے نتیجے میں ٹینک کا عملہ جان کی بازی ہار گیا۔
پوسٹ میں کہا گیا’’فوج مشرقی لداخ میں آپریشن کے دوران پانچ بہادر جوانوں کی ہلاکت پر افسوس کا اظہار کرتی ہے ‘‘۔انہوں نے کہا کہ بچائو آپریشن ہنوز جاری ہے ۔
قبل ازیں ذرائع نے بتایا کہ یہ حادثہ دولت باغ اولڈی کے مندر موڑ علاقے میں اس وقت پیش آیا جب ٹی۷۲ٹینک جسے فوج کے اہلکار چلا رہے تھے دریا عبور کرنے کے دوران غرق آب ہوگیا۔انہوں نے کہا’’ٹینک میں پانچ فوجی جوان سوار تھے جب یہ حادثہ پیش آیا اور اس حادثے میں پانچوں جوانوں کی موت واقع ہوئی‘‘۔
دریں اثنا وزیر دفاع راج ناتھ سنگھ نے اس حادثے پر اظہار دکھ کرتے ہوئے لواحقین کے ساتھ اظہار تعزیت کیا ہے ۔
سنگھ نے’ایکس‘پر اپنے ایک پوسٹ میں کہا’’لداخ میں ایک ٹینک کو دریا پار کرانے کے دوران پیش آنے والے حادثے ، جس میں ہماری فوج کے پانچ بہادر جوان جاں بحق ہوئے ، پر گہرا دکھ ہوا‘‘۔
وزیر دفاع کا کہنا تھا’’ہم قوم کے تئیں اپنے بہادر جوانوں کی مثالی قربانی کو کبھی بھول نہیں سکتے ہیں‘‘۔
سنگھ نے متاثرہ کنبوں کو تعزیت پیش کرتے ہوئے کہا’’قوم مصیبت کی اس گھڑی میں متاثرین کے ساتھ کھڑی ہے ۔‘‘