ای وی ایم بن گیا ’بلیک باکس‘، اسکی جانچ کی اجازت کسی کو نہیں:راہل

نئی دہلی//
کانگریس لیڈر راہل گاندھی نے کہا ہے کہ الیکٹرانک ووٹنگ مشین (ای وی ایم) سے چھیڑ چھاڑ کی بات ہمارے انتخابی عمل کی شفافیت پر سوال کھڑا کرتی ہے اور یہ ہندوستانی جمہوریت کے لیے سنگین تشویش کا باعث ہے ۔
راہل نے کہا کہ ای وی ایم ایک ایسا بلیک باکس بن گیا جس کی جانچ کی اجازت کسی کو نہیں ہے اوریہی ہمارے انتخابی عمل کی شفافیت پر ایک بڑا سوال اٹھاتا ہے ۔
کانگریسی لیڈر نے کہا’’ہندوستان میں ای وی ایم ایک’بلیک باکس‘ہیں اور کسی کو ان کی جانچ کرنے کی اجازت نہیں ہے ۔ ہمارے انتخابی عمل میں شفافیت پر شدید تحفظات کا اظہار کیا جا رہا ہے ۔ جب اداروں میں احتساب کا فقدان ہوجاتا ہے تو جمہوریت ایک دکھاوا بن جاتی ہے اوردھوکہ دہی کا شکار ہوجاتی ہے ‘‘۔
کانگریس پارٹی نے کہا’’ای وی ایم سے متعلق ایک سنگین معاملہ سامنے آیا ہے ۔ ممبئی میں نیشنل ڈیموکریٹک الائنس (این ڈی اے ) کے امیدوار رویندر وائیکر کے رشتہ دار کا موبائل فون ای وی ایم سے منسلک تھا۔ این ڈی اے کے اس امیدوارکی جیت صرف۴۸ووٹوں سے ہوئی ہے ‘‘۔
پارٹی نے سوال کیا’’ایسے میں سوال ہے کہ آخر این ڈی اے امیدوار کے رشتہ دار کا موبائل ای وی ایم سے کیوں جڑا تھا؟ جہاں ووٹوں کی گنتی ہو رہی تھی وہاں موبائل فون کیسے پہنچا؟ بہت سے سوالات ہیں جو شکوک و شبہات کو جنم دیتے ہیں۔ الیکشن کمیشن کو وضاحت دینی چاہیے ۔‘‘