وزیر اعظم مودی کی اگلے ہفتے سرینگر آمد ‘ سکیورٹی مزید سخت

سرینگر//
وزیر اعظم ‘نریندر مودی کے کشمیر دورے سے قبل سرینگر میں سیکورٹی کے انتظامات میں مزید اضافہ کیا گیا ہے جبکہ وادی بھر میں فورسز کو چوکس رہنے کی ہدایات دی گئی ہیں۔
سیکورٹی انتظامات کے پیش نظر پولیس افسران نے سرینگر کے پولیس کنٹرول روم میں ایک اجلاس منعقد کرکے شہر میں سیکورٹی بڑھانے کیلئے منصوبہ بندی کی ہے۔
اس منصوبے کے تحت شہر سرینگر میں سنٹرل ریزرو پولیس فورس (سی آر پی ایف) اور پولیس اہلکاروں کی اضافی نفری کو تعینات کیا جائے گا۔
منصوبے کے مطابق سرینگر کے ائرپورٹ روڑ سے ایس کے آئی سی سی تک کے راستے میں سیکورٹی انتظامات سخت کئے جائیں گے جبکہ سی سی ٹی وی کیمروں کے ذریعے شہر کی نگرانی بڑھائی جائے گی۔
ایک پولیس افسر نے اس ضمن میں کہا ’’پولیس اور سی آر پی ایف کے کمانڈوز کو ایس کے آئی سی سی کے ارد گرد تعینات کیا جائے گا، وہیں پولیس کے اسپیشل آپریشنز گروپ (ایس او جی) کے اہلکاروں کو شہر کی اندرون سڑکوں پر تعینات کرکے شہریوں اور شر پسند عناصر پر نگرانی رکھی جائے گی‘‘۔
غور طلب ہے کہ وزیر اعظم نریندر مودی۲۱ جون کو بین الاقوامی یوگا ڈے منانے کے سلسلے میں سرینگر وارد ہو رہے ہیں۔ یہ مودی کا تیسری مرتبہ وزیر اعظم بننے کے بعد کشمیر کا پہلا دورہ ہوگا۔
اس یوگا ڈے کو منانے کے سلسلے میں جموں کشمیر سپورٹس کونسل تیاریاں کر رہا ہے جو یوگا کے لئے کھلاڑیوں کو تیار کر رہا ہے۔ یہ تقریب سرینگر کے ایس کے آئی سی سی میں ۲۱جون کی صبح منعقد ہوگی۔
بتایا جا رہا ہے کہ وزیر اعظم ۲۰ جون کی شام کو ہی سرینگر آ سکتے ہیں اور رات کو سرینگر میں ہی قیام کریں گے۔