طبی نگہداشت شعبہ میں نرسنگ اسٹاف ریڑھ کی ہڈی کی حیثیت رکھتا ہے:سنہا

جموں//
لیفٹیننٹ گورنر‘ منوج سنہا نے کہا ہے کہ نرسنگ سٹاف ہیلتھ کیئر کے شعبے میں ریڑھ کی ہڈی کی حیثیت رکھتا ہے۔
لیفٹیننٹ گورنر نے شری ماتا ویشنودیوی کالج آف نرسنگ کی لیمپ لائٹنگ تقریب میں اَپنے خطاب کے دوران کہا کہ نرسنگ سٹاف ہیلتھ کیئر کے شعبے میں ریڑھ کی ہڈی کی حیثیت رکھتا ہے ۔ اُنہوں نے کہا کہ وہ احتیاطی ، تشخیصی او رعلاج معالجے کی خدمات میں مختلف سطحوں کی دیکھ ریکھ فراہم کرنے کیلئے اَچھی طرح سے تربیت یافتہ ہیں۔
سنہا نے جموںکشمیر میں صحت شعبے کو تبدیل کرنے کیلئے حکومت کی کوششوں پر روشنی ڈالتے ہوئے کہا کہ گذشتہ تین برسوں میں ہم نے لوگوں کو صحت کے تحفظ اور فروغ کے لئے طبی تعلیم اور تربیت کیلئے خاطر خواہ سرمایہ کاری کی ہے۔
لیفٹیننٹ گورنر نے کہا کہ ہماری یہ مسلسل کوشش ہے کہ ہر شہری کو سستی ہیلتھ کیئر کو یقینی بنایا جائے ۔ اُنہوں نے مشاہدہ کیا کہ صحت شعبے کیلئے بجٹ میں مختص رقم میں غیر معمولی اِضافے کے علاوہ حکومت نے دیہی علاقوں میں ہیلتھ کیئر میں عدم مساوات کو کم کرنے کی کوشش کی ہے۔
سنہا نے مزید کہاکہ لائٹنگ اور حلف برداری کی تقریب جدید نرسنگ کے بانی ’’ فلور ینس نائنگیل ‘‘ کو ایک بہترین خراجِ عقیدت ہے اور اِس موقعہ پر کالج آف نرسنگ کی اِنتظامیہ ، فیکلٹی اور عملے کو مبارک باد دی۔
لیفٹیننٹ گورنر نے جموںوکشمیر میں ہیلتھ کیئر کے ایک مضبوط ماحولیاتی نظام کو تیار کرنے کیلئے مخلصانہ کوششیں کرنے پر وزیر اعظم نریندرمودی کا شکریہ ادا کیا۔
سنہا نے کہا کہ جموںوکشمیر کے لوگ کئی دہائیوں سے بنیادی صحت سہولیات سے محروم تھے۔ دو ایمز ، دو کینسر اِنسٹی چیوٹ ، سات نئے میڈیکل کالج‘۱۵نئے نرسنگ کالج اور ہزاروں صحت اور فلاح وبہبود ی مراکز کے علاوہ یونیورسل ہیلتھ اِنشورنس کوریج۵لاکھ روپے تک آیوشمان بھارت۔صحت نے اس بات کو یقینی بنایا ہے کہ جموں و کشمیر میں ہیلتھ کیئرکی بہترین سہولیات موجود ہیں۔
لیفٹیننٹ گورنر نے شری ماتا ویشنودیوی نارائنا ہسپتال کے اِنتظام کی بھی تعریف کی تاکہ لوگوں کو معیاری طبی سہولیات فراہم کی جائیں اور صحت سے فائدہ اُٹھانے والوں کے علاج کیلئے۴۰ بستروں پر مشتمل خصوصی وارڈ بنایا جائے۔
سنہا نے معاشرے کے تمام طبقات بالخصوص دُور دراز علاقوں میں رہنے والوں کی فلاح و بہبود اور بہتر صحت کیلئے حکومت کی جانب سے اُٹھائے جانے والے مختلف اقدامات پر مزید روشنی ڈالی ۔
لیفٹیننٹ گورنر نے شرائن بورڈ کی طرف سے کئے گئے بہت سے اقدامات کو بھی یاد کیا جن میں آن لائن درشن ، پرسا دکی ہوم ڈیلیوری ، کال سینٹر ، اِی لائبریری ، ہائی ٹیک ویڈیو وال ، ہیلی کاپٹر سروس ، بیٹری کار سروس ، مسافر روپ وے ٹٹوسروس ، پانی کے تحفظ اور صفائی کے اقدامات شامل ہیں۔
سنہا نے مزید کہا کہ دُرگا بھون ، سکائی واک ، آر ایف آئی ڈی پروجیکٹ ، تھیم پارک اور شنکر آچاریہ مندر جیسے پروجیکٹ شری ماتا ویشنودیوی کے عقیدت مندوں کی یاترا کو زیادہ آسان اور یاد گار بنائیں گے ۔
اِس موقعہ پر لیفٹیننٹ گورنر نے ایس ایم وی ڈی سی او این اور ایس ایم وی ڈی گوروکل کے بہتر ین کارکردگی کا مظاہرہ کرنے والے طلباء کو ایوارڈ پیش کئے جنہوں نے گذشتہ دو برسوں کے دوران تعلیمی اور ہم نصابی سرگرمیوں میں بہترین کار کردگی کا مظاہر ہ کیا۔