این ڈی اے نے تاریخ رقم کردی ‘مسلسل تیسری بار سرکار بنانے کی راہ ہموار

نئی دہلی//
وزیر اعظم نریندر مودی کی قیادت میں قومی جمہوری اتحاد (این ڈی اے) نے منگل کو لوک سبھا کی اکثریتی نشستوں پر کامیابی حاصل کی اور تاریخی تیسری مدت کے لئے راہ ہموار کی۔
اب تک اعلان کردہ نتائج کے مطابق بی جے پی اب تک ۲۳۹ نشستوں پر آگے ہے۔ تاہم حتمی نتائج آنا ابھی باقی ہیں۔
کانگریس ۱۰۰ نشستوں پر آگے ہے جبکہ انڈیا اتحادنے انتخابات میں بڑی کامیابی حاصل کرکے۲۳۲ نشستوں پر سبقت لے کر بی جے پی کے’۳۰۰ پار‘مارچ کو روک دیا ہے۔
این ڈی اے نے دہلی ‘مدھیی پردیش ‘ گجرات ‘اوڈیسہ ‘ہماچل پردیش ‘چھتیس گڑھ ‘بہاراور آندھرا پردیش میں اچھی کا کرردگی کا مظاہرہ کیا ۔ جبکہ انڈیا اتحاد نے تامل ناڈو‘ کیریلا ‘ راجستھان ‘ مہاراسٹر ‘ اتر پردیش اور مغربی بنگال میں بہتر کا کردگی دکھائی ۔
تازہ ترین اعداد و شمار کے مطابق این ڈی اے کو ۲۹۲اور انڈیا اتحادکو ۲۳۲ سیٹیں مل سکتی ہیں۔ حکومت سازی کے لیے ۲۷۲ سیٹوں کی ضرورت ہوتی ہے۔
واضح رہے کہ ۱۹؍اپریل سے یکم جون تک بھارت کی مختلف ریاستوں میں لوک سبھا کی ۵۴۳ نشستوں کے لیے ووٹ ڈالے گئے تھے۔
انتخابات میں لگ بھگ ایک ارب لوگ ووٹ ڈالنے کے اہل تھے جن میں سے ۶۶ فی صد سے زیادہ ووٹرز نے اپنا حقِ رائے دہی استعمال کیا تھا۔
یکم جون کو ووٹنگ کا ساتواں مرحلہ مکمل ہونے کے بعد مقامی میڈیا میں جو ایگزٹ پولز سامنے آئے تھے، ان میں این ڈی اے کو دو تہائی اکثریت ملنے کا امکان ظاہر کیا گیا تھا۔ متعدد ایگزٹ پولز میں کہا گیا تھا بی جے پی تنہا ۳۰۳ سے زیادہ نشستیں حاصل کر سکتی ہے۔
ایگزٹ پولز میں اپوزیشن جماعتوں پر مشتمل انڈیا اتحادکو۶۰ سے زیادہ نشستیں ملنے کا امکان ظاہر کیا جا رہا تھا۔
تاہم منگل کو آںے والے ابتدائی جائزوں نے ایگزٹ پولز کو الٹ پلٹ کر رکھ دیا ہے۔
واضح رہے کہ ایگزٹ پولز بعض نجی کمپنیوں کی جانب سے ووٹرز کی آرا پر مشتمل جاری کردہ ممکنہ انتخابی نتائج ہوتے ہیں۔ البتہ ماضی میں بھارت میں ایگزٹ پولز کے نتیجے غلط بھی ثابت ہوئے ہیں۔
ووٹوں کی گنتی سے ملنے والے رجحانات کے مطابق بی جے پی کو ملک کی سب سے بڑی ریاست اترپردیش (یو پی) میں کافی نقصان ہو رہا ہے۔ وہاں سب سے زیادہ ۸۰ نشستیں ہیں‘جہاں اسے ۳۶ نشستیں جبکہ انڈیا اتحاد کو غیر متوقع طور پر۴۳ سیٹیں ملیں۔
سال ۲۰۱۹ کے انتخابات میں بی جے پی کو یو پی سے ۶۲ نشستیں ملی تھیں۔
دریں اثنا وزیر اعظم نریندر مودی نے لوک سبھا انتخابات میں بھارتیہ جنتا پارٹی (بی جے پی) کی قیادت والی قومی جمہوری اتحاد (این ڈی اے ) کی مسلسل تیسری جیت کو ایک تاریخی لمحہ قرار دیتے ہوئے اس کے لیے ملک کے عوام سے اظہار تشکر کیا ہے ۔
مودی نے کہا کہ اتحاد ملک کے لوگوں کی امنگوں کو پورا کرنے کے لیے نئی طاقت کے ساتھ کام کرے گا۔
۱۸ویں لوک سبھا کے نتائج اور رجحانات کے درمیان منگل کی شام کو ایک پوسٹ میں وزیر اعظم نے کہا’’ملک کے لوگوں نے مسلسل تیسری بار این ڈی اے پر اپنے اعتماد کا اظہار کیا ہے ۔ یہ ہندوستان کی تاریخ کا ایک مثالی لمحہ ہے ۔ میں اس محبت اور آشیرواد کے لیے اپنے خاندان کے سلام کرتا ہوں۔ میں ہم وطنوں کو یقین دلاتا ہوں کہ ہم ان کی امنگوں کو پورا کرنے کے لیے نئی توانائی، نئے جوش اور نئے عزم کے ساتھ آگے بڑھیں گے ۔ میں تمام کارکنوں کو مبارکباد پیش کرتا ہوں جنہوں نے لگن اور انتھک محنت کی ہے ۔ میں ان کا تہہ دل سے شکریہ ادا کرتا ہوں ۔‘‘