۱۹۶۲کے بعد پہلی بار مسلسل تیسری بار کوئی حکومت بنا رہا ہے: مودی

سرینگر//
وزیراعظم نریندر مودی نے کہا ہے کہ ان کی جماعت بے جے پی کی قیادت والا نیشنل ڈیموکریٹک اتحاد (این ڈی اے) مرکز میں حکومت بنائے گا۔
بی جے پی ہیڈ کوارٹرز پر خطاب کے دوران نریندر مودی نے کہا کہ ’آج کی جیت دنیا کی سب سے بڑی اور انڈین شہریوں کی جیت ہے۔‘
مودی نے انڈین جمہوریت کو مثال قرار دیتے ہوئے کہا کہ ’ہر انڈین اس کی وجہ سے فخر محسوس کرتا ہے۔‘انھوں نے نئی دہلی میں ’کلین سویپ‘ کا دعویٰ کرتے ہوئے یہ بھی کہا کہ کچھ علاقوں میں ان کی پارٹی کو ملنے والے ووٹوں کی تعداد دوگنی ہے۔
واضح رہے کہ سات ہفتوں تک جاری رہنے انتخابات میں ووٹوں کی گنتی کا عمل جاری ہے اور ابتدائی رجحانات کے مطابق بی جے پی اور اس کی اتحادی جماعتوں نے ۲۹۲ جبکہ کانگریس اور اس کی اتحادی جماعتوں نے ۲۳۲ نشستیں حاصل کی ہیں۔
وزیر اعظم نے اپوزیشن انڈیا بلاک کو تنقید کا نشانہ بناتے ہوئے کہا کہ وہ اتنی سیٹیں نہیں جیت سکی جتنی بھارتیہ جنتا پارٹی (بی جے پی) نے لوک سبھا انتخابات میں اپنے بل بوتے پر جیتی ہے۔انہوں نے کہا کہ اپوزیشن متحد ہونے کے باوجود اتنی سیٹیں نہیں جیت سکی جتنی بی جے پی نے اپنے بل بوتے پر حاصل کیں۔
مودی نے کہا’’ این ڈی اے نے آندھرا پردیش، اڈیشہ، سکم، اروناچل پردیش میں بھی کامیابی حاصل کی ہے جہاں اسمبلی انتخابات ہوئے تھے۔ ان ریاستوں میں کانگریس کا صفایا ہو چکا ہے۔ اوڈیشہ میں پہلی بار بی جے پی حکومت بنائے گی۔ اس نے اڈیشہ میں لوک سبھا انتخابات میں بھی غیر معمولی کارکردگی کا مظاہرہ کیا ہے‘‘۔
جموں و کشمیر میں رائے دہندگان کے ٹرن آؤٹ پر روشنی ڈالتے ہوئے وزیر اعظم مودی نے کہا کہ جموں کشمیر کے رائے دہندگان نے ریکارڈ تعداد میں ووٹ ڈال کر بے مثال جوش و خروش کا مظاہرہ کیا ہے۔ انہوں نے قوم کو بدنام کرنے کی کوشش کرنے والوں کو آئینہ بھی دکھایا ہے۔ میں فتح کے اس موقع پر لوگوں کو سلام پیش کرتا ہوں۔
وزیر اعظم نے کہا کہ۱۹۶۲کے بعد پہلی بار کسی حکومت نے مسلسل تیسری بار مینڈیٹ حاصل کیا ہے۔