جموں کشمیر میں بی جے پی اور این سی کی دو دو نشستوں پر کامیابی

سرینگر//
جموں کشمیر کی پانچ لوک سبھا نشستوں میں سے بھارتیہ جنتا پارٹی(بی جے پی) نے دو جبکہ نیشنل کانفرنس(این سی) نے اتنی ہی نشستوں پر کامیابی حاصل کی ہے ۔شمالی کشمیر کی نشست پر آزاد امیدوار نے کامیابی حاصل کی ہے ۔
موجودہ رکن پارلیمنٹ ڈاکٹر جتیندر سنگھ نے اپنے قریبی حریف کانگریس کے چودھری لال سنگھ کو ایک لاکھ چوبیس ہزار تین سو ترتیس ووٹوں سے شکست دے کر اودھم پور حلقہ جیت لیا جبکہ دوسرے موجودہ رکن پارلیمنٹ جوگل کشور نے کانگریس کے رمن بھلا کو ایک لاکھ ۳۱ہزار ۵۴۰ ووٹوں کے فرق سے شکست دے کر جموں پارلیمانی حلقہ جیت لیا۔
الیکشن کمیشن کی ویب سائٹ پر دستیاب تازہ ترین اعداد و شمار کے مطابق ڈاکٹر جتیندر سنگھ کو کل ۵لاکھ۷۱ہزار۷۶جبکہ کشور کو ۶لاکھ۷۷ہزار۵۷۱ووٹ ملے۔
اننت ناگ راجوری حلقے سے نیشنل کانفرنس کی میان الطاف نے جیت حاصل کی جنہوں نے اپنے نزدیکی مد مقابل اور پی ڈی پی کی صدر‘ محبوبہ مفتی کو ۲لاکھ ۸۱ ہزار۷۹۴ ووٹوں سے شکست دی ۔ الطاف نے ۵لاکھ ۲۱ ہزار۸۶۳ جبکہ محبوبہ نے ۲لاکھ ۴۰ہزار۴۲ ووٹ حاصل کئے ۔
اس حلقے سے اپنی پارٹی کے امیدوار ظفر اقبال منہاس نے ایک لاکھ ۴۲ہزار۱۹۵ ووٹ حاصل کئے ۔
بارہمولہ حلقے سے آزاد امید وار‘ عبدالرشید شیخ عرف انجینئر رشید نے اپنے قریبی مدمقابل اور سابق وزیر اعلیٰ عمر عبداللہ کو دو لاکھ ۴ہزار۴۲ ووٹوں سے شکست دی ۔ رشید نے مجموعی طور پر ۴لاکھ ۷۲ ہزار۴۸۱ووٹ حاصل کئے ۔ عمرعبداللہ کو۲لاکھ ۶۸ ہزار۳۳۹ ووٹ ملے۔ پیپلز کانفرنس کے سجاد غنی لون کو ایک لاکھ ۷۳ہزار۲۳۹ ووٹ ملے ۔
سرینگر کی نشست نیشنل کانفرنس کے حصے میں آئی ۔ اس کے امیدوار آغا سید روح اللہ مہدی نے اپنے قریبی مد مقابل پی ڈی پی کے وحید الرحمان پرا کوایک لاکھ ۸۸ہزار۴۱۶ ووٹوں سے شکست دی ۔روح اللہ نے ۳لاکھ ۵۶ ہزار۸۶۶ جبکہ پرا نے ایک لاکھ ۶۸ ہزار۴۵۰ ووٹ حاصل کئے ۔اپنی پارٹی کے محمد اشرف میر کو ۶۵ ہزار۹۵۴ ووٹ ملے ۔
۲۰۱۹ کے لوک سبھا الیکشن میں نیشنل کانفرنس نے تینوں نشستوں پر جیت حاصل کی تھی ۔ سرینگر سے ڈاکٹر فاروق عبداللہ ‘ شمالی کشمیر سے محمد اکبر لون جبکہ جنوبی کشمیر سے حسنین مسعودی الیکشن جیت گئے تھے ۔