سرینگر//
اینٹی کرپشن بیورو (اے سی بی) نے کے پی ڈی سی ایل’’ سب ڈویژن سوپور میں تعینات سینئر اسسٹنٹ کو نو ہزار روپے کی رشوت لیتے ہوئے رنگے ہاتھوں دھر دبوچ کر سلاخوں کے پیچھے دھکیل دیا۔
اے سی بی کے ایک ترجمان نے بتایا کہ اینٹی کرپشن بیورو میں ایک شخص نے تحریر ی طورپر شکایت درج کی کہ کے پی ڈی سی ایل،سب ڈویژن سوپور میں تعینات سینئر اسسٹنٹ محمد شفیع بٹ سیکورٹی ڈپازٹ کی واگزاری کی خاطر دس ہزار روپے کی رشوت طلب کر رہا ہے ۔
شکایت گزار نے کہا’’وہ ایم ایس پرنٹ پلس کے نام سے درگاہ حضرت بل میں ایک فرم چلا رہا ہے اور سال ۲۰۲۱میں ،کے پی ڈٰ سی ایل’ ’کو سٹیشنری اور لاگ بکس فراہم کئے ‘‘۔
ان کے مطابق گر چہ سٹیشنری کے پیسے واگزار کئے گئے لیکن سیکورٹی ڈپازٹ جو کہ۱۵ہزار ۵۶۰روپے ہے کی وگزاری کی خاطر سینئر اسسٹنٹ دس ہزار روپے کی رشوت مانگ رہا ہے ۔
انہوں نے مزید الزام لگایا کہ کئی دفعہ متعلقہ محکمہ کے ساتھ رابط قائم کیا لیکن ہر بار سینئر اسسٹنٹ لیت ولعل کا مظاہرہ کر رہا تھا اور بالآخر پیسے واگزار کرنے کی خاطر دس ہزار روپیہ کا تقاضہ کیا ۔
اے سی بی ترجمان کے مطابق اینٹی کرپشن بیورو نے سرکاری ملازم کے خلاف کیس درج کرکے تحقیقات شروع کی ۔انہوں نے بتایا کہ اے سی بی نے ایک جال بچھایا جس دوران سینئر اسسٹنٹ کو سائل سے رشوت لیتے ہوئے رنگے ہاتھوں گرفتار کیا گیا ۔
ان کے مطابق آزاد گواہوں کی موجودگی میں سرکاری ملازم کے قبضے سے رشوت کی رقم برآمد کرکے ضبط کی گئی ۔