’یہ ترقی یا جہاد کیلئے ووٹ کا مقابلہ ہے‘….کانگریس شریعت اور قرآن کی بنیاد پر تلنگانہ چلانا چاہتی ہے:وزیر داخلہ

حیدر آباد//
مرکزی وزیر داخلہ امیت شاہ نے جمعرات کو کہا کہ ۲۰۲۴ کا الیکشن راہل گاندھی بمقابلہ نریندر مودی ہے اور یہ ترقی کیلئے ووٹ اور جہاد کے لئے ووٹ کے درمیان مقابلہ ہے۔
تلنگانہ کے بھونگیر لوک سبھا حلقہ میں ایک انتخابی ریلی سے خطاب کرتے ہوئے شاہ نے کہا کہ یہ انتخاب وزیر اعظم نریندر مودی کی ’بھارتیہ گارنٹی‘ اور کانگریس لیڈر راہول گاندھی کی ’چینی گارنٹی‘ کے درمیان مقابلہ ہے۔
کانگریس، بی آر ایس اور اے آئی ایم آئی ایم کوخوشنودی کا تکونہ قرار دیتے ہوئے وزیر داخلہ نے کہا کہ یہ پارٹیاں رام نومی جلوس نہیں نکالنے دیتی ہیں اور وہ سی اے اے کی بھی مخالفت کرتی ہیں۔
وزیر داخلہ نے کہا’’یہ لوگ’حیدرآباد لبریشن ڈے‘ (۱۷ ستمبر) منانے کی اجازت نہیں دیتے ہیں۔ یہ لوگ سی اے اے کی مخالفت کرتے ہیں۔ یہ لوگ شریعت اور قرآن کی بنیاد پر تلنگانہ چلانا چاہتے ہیں‘‘۔
شاہ نے کہا کہ بی جے پی اب تک لوک سبھا انتخابات کے تین مرحلوں میں تقریباً۲۰۰ نشستیں حاصل کرے گی اور تلنگانہ کو پارٹی کو ۴۰۰ نشستوں کے ہدف کو عبور کرنے میں مدد کرنے کیلئے ووٹ دینے کی ضرورت ہے۔
وفاقی وزیر داخلہ نے کہا کہ بی جے پی نے ۲۰۱۹ میں تلنگانہ کی۱۷ لوک سبھا سیٹوں میں سے چار پر کامیابی حاصل کی تھی اور چیف منسٹر اے ریونت ریڈی کو اس بات کا احساس ہونا چاہئے کہ بی جے پی موجودہ انتخابات میں ۱۰سے زیادہ سیٹیں جیتے گی۔
شاہ نے پیش گوئی کی کہ تلنگانہ میں ڈبل ڈیجٹ اسکور وزیر اعظم مودی کو ۴۰۰ نشستوں کو عبور کرنے میں مدد دے گا۔
کانگریس کے اس الزام کا حوالہ دیتے ہوئے کہ بی جے پی آئین کو تبدیل کرے گی اور ریزرویشن کو ختم کرے گی ، انہوں نے کہا کہ کانگریس جھوٹ بول کر الیکشن لڑنا چاہتی ہے۔
شاہ نے کہا کہ کانگریس کا کہنا ہے کہ مودی کوٹہ ختم کردیں گے لیکن انہوں نے گزشتہ ۱۰سالوں سے مکمل اکثریت کے ساتھ اقتدار میں رہنے کے باوجود ایسا نہیں کیا۔ لیکن تلنگانہ میں کانگریس نے مسلمانوں کو چار فیصد ریزرویشن دے کر ایس سی، ایس ٹی اور او بی سی کے ریزرویشن پر ڈاکہ ڈالا۔ شاہ نے کہا کہ اگر بی جے پی اقتدار میں آئی تو مسلم ریزرویشن کو ختم کرے گی اور ایس سی ، ایس ٹی اور او بی سی کوٹے میں اضافہ کرے گی۔
وزیر داخلہ نے کہا کہ اے آئی سی سی کے صدر ملکارجن کھڑگے نے کہا کہ اگرچہ راجستھان اور تلنگانہ کے لوگوں کا کشمیر سے کوئی لینا دینا نہیں ہے ، لیکن بھونگیر کے لوگ کشمیر کی خاطر اپنی جان قربان کرنے کے لئے تیار ہیں۔
دفعہ ۳۷۰ کے خاتمے پر روشنی ڈالتے ہوئے شاہ نے یہ بھی کہا کہ مودی نے دہشت گردی ، نکسل ازم کو ختم کیا ہے اور ملک کو محفوظ بنایا ہے۔ انہوں نے الزام عائد کیا کہ اے آئی ایم آئی ایم کے صدر اسد الدین اویسی، بی آر ایس اور کانگریس’خوش نودی کی اے بی سی‘ ہیں۔