جموں//
فوج نے جموں و کشمیر کے ضلع پونچھ میں بھارتی فضائیہ (آئی اے ایف) پر حملے میں ملوث دو جنگجوئوں کے خاکے جاری کرکے ان کے متعلق جانکاری فراہم کرنے والے کیلئے۲۰لاکھ روپیے انعام دینے کا اعلان کیا ہے ۔
بتادیں کہ پونچھ کے مینڈھر علاقے میں ہفتے کی شام آئی اے ا یف کی ایک کانوائے پر جنگجوئوں نے گھات لگا کر حملہ کیا تھا جس میں۵؍اہلکار زخمی ہوئے تھے جن میں سے کارپورل وکی پہاڑے نامی ایک اہلکار زخموں کی تاب نہ لا کر دم توڑ گیا تھا۔
فوج نے اس حملے میں ملوث دو جنگجوؤں کے خاکے جاری کئے ہیں۔فوج کا کہنا ہے’’ان دہشت گردوں کے بارے میں معتبر جانکاری فراہم کرنے والے کو۲۰لاکھ روپے انعام دئے جائیں گے اور اطلاع دہندہ کی شناخت کو صیغہ راز میں رکھا جائے گا‘‘۔
دریں اثنا پونچھ میں حملہ آوروں کی تلاش پیر کو مسلسل تیسرے روز بھی وسیع پیمانے پر جاری ہے ۔
حکام کا کہنا ہے کہ اب تک ۲۰؍افراد کو پوچھ تاچھ کے لئے حراست میں لیا گیا ہے ۔
دریں اثنا چیف آف ایئر سٹاف (سی اے ایس) ایئر چیف مارشل وی آر چودھری اور بھارتی فضائیہ کے تمام اہلکاروں نے بہادر کارپورل وکی پہاڑے کو شاندار خراج عقیدت پیش کیا ہے اور سوگوار خاندان کو گہری تعزیت پیش کی ہے ۔
انہوں نے’ایکس‘پر ایک پوسٹ میں کہا’’ہم سوگوار خاندان کے ساتھ اظہار تعزیت کرتے ہیں اور مصیبت کی اس گھڑی میں ان کے ساتھ کھڑے ہیں۔‘‘