سرینگر//
منشیات فروشوں کے خلاف جنگ کو جاری رکھتے ہوئے جموں وکشمیر پولیس نے شمالی کشمیر کے ضلع بارہمولہ کے کنزر علاقے میں ایک بدنام زمانہ منشیات فروش کی لاکھوں روپیے مالیت کی غیر منقولہ جائیداد کو قرق کر دیا۔
ایک پولیس ترجمان نے اپنے ایک بیان میں کہا کہ بارہمولہ پولیس نے ایک بدنام زمانہ منشیات فروش کی قریب۵۰لاکھ روپے مالیت کی۹مرلہ اراضی اور دو منزلہ رہائشی مکان کی صورت میں غیر منقولہ جائیداد کو قرق کر دیا۔انہوں نے منشیات فروش کی شناخت شبیر احمد صوفی ولد عبدالخالق ساکن مازہامہ ماگام کے طور پر کی ہے ۔
بیان میں کہا گیا کہ یہ کارروائی این ڈی پی ایس ایکٹ۱۹۸۵کے متعلقہ دفعات کے تحت انجام دی گئی اور اس سلسلے میں پولیس اسٹیشن کنزر میں ایک ایف آئی آر زیر نمبر۲۰۲۴/۵درج ہے ۔
ترجمان نے کہا کہ پولیس کی طرف سے تحقیقات کے دوران اس جائیداد کی شناخت غیر قانونی طور حاصل شدہ جائیداد کے طور پر ہوئی ہے ۔پولیس بیان کے مطابق لوگوں نے پولیس کی اس کارروائی کی سراہنا کی ہے ۔
قابل ذکر ہے کہ بارہمولہ پولیس نے ضلع میں سال رواں کے پہلے چار مہینوں کے دوران این ڈی پی ایس ایکٹ کے تحت۷۹مقدمے درج کرکے۳۶سخت گیر منشیات فروشوں سمیت۱۴۵منشیات فروشوں کو گرفتار کیا ہے اور ان کی تحویل سے ایک کروڑ۸۸لاکھ رویے مالیت کا نشہ آور مواد بھی بر آمد کیا ہے ۔